স্পৰ্টছ ডেস্ক, ১১ নৱেম্বৰ : ৱেষ্ট ইণ্ডিজৰ প্ৰাক্তন কিংবদন্তী ক্ৰিকেটাৰ ছাৰ ভিভিয়ান ৰিচাৰ্ডছে বিৰাট কোহলীক প্ৰশংসাৰে উপচাই দিছে । বিৰাট কোহলীৰ প্ৰশংসাত তেওঁ কয় যে কোহলী ক্ৰিকেটৰ সৰ্বকালৰ মহান খেলুৱৈসকলৰ মাজৰ এগৰাকী । আনহাতে, অপৰাজিত ভাৰতে চলিত আইচিচি পুৰুষ ক্ৰিকেট বিশ্বকাপত ছেমি ফাইনেলৰ বাবে সাজু হৈছে । কোহলীয়ে অলপতে তেওঁৰ ৪৯ সংখ্যক শতক পূৰ্ণ কৰি ৩৫ সংখ্যক জন্মদিন উদযাপন কৰিছে । শচীন তেণ্ডুলকাৰৰ সৈতে তেওঁ বিশ্ব অভিলেখৰ সমকক্ষ হৈছে । ইফালে ৰিচাৰ্ডছে টীম ইণ্ডিয়াক পৰামৰ্শ দি কয় যে 'ইতিবাচক হৈ থাকক আৰু যিকোনো মূল্যৰ বিনিময়ত আক্ৰমণ কৰক' । কিয়নো মেন ইন ব্লুয়ে আকাংক্ষিত ট্ৰফী দাঙি লোৱাৰ পথত অগ্ৰসৰ হৈছে ।
দুবাৰকৈ আইচিচি পুৰুষ ক্ৰিকেট বিশ্বকাপ বিজয়ী প্ৰখ্যাত ক্ৰিকেটাৰ ছাৰ ভিভিয়ান ৰিচাৰ্ডছে ভাৰতৰ আঠটা বিজয়ৰ নিখুঁত অভিলেখেৰে দলটোৱে আগন্তুক ছেমি ফাইনেলত স্থান সুৰক্ষিত ৰখাৰ বাবে অভিনন্দন জনায় ।
উল্লেখ্য যে ১৯৭৫ আৰু ১৯৭৯ চনত ৱেষ্ট ইণ্ডিজৰ বিশ্বকাপ বিজয়ৰ সময়ত মুখ্য ভূমিকা আছিল ৰিচাৰ্ডছৰ । উজ্জ্বল ভাবমূৰ্তি আৰু আক্ৰমণাত্মক শৈলীৰ বাবে জনাজাত ৰিচাৰ্ডছে ভাৰতে নিজৰ শক্তি অনুসৰি খেলা আৰু নেতিবাচকতা পৰিহাৰ কৰাৰ ওপৰত গুৰুত্ব আৰোপ কৰে । তেওঁ ভাৰতৰ অপৰাজিত বিশ্বকাপ যাত্ৰাৰ ওপৰত আস্থা ব্যক্ত কৰে আৰু এই দৃষ্টিভংগীৰে দলটোক নিৰ্ভীক শৈলী অব্যাহত ৰাখিবলৈ আহ্বান জনায় ।
"ভাৰতৰ এনে এটা মানসিকতা আছে যে তেওঁলোকে এনেদৰে খেলিব পাৰে । এইটো পৰৱৰ্তী সময়তো একে হ'ব লাগে । মই যদি সেই ড্ৰেছিং ৰুমত থাকোঁ তেন্তে মোৰ আহ্বান হ'ব– আহক সকলোৱে হাতে হাত ধৰি বাহিৰলৈ যাওঁ । সেই পদ্ধতিটোৱে এতিয়ালৈকে কাম কৰিছে আৰু যদি সেইটো সলনি হয়, তেন্তে পৰিস্থিতি বিপথে যাব পাৰে ।"
"মোৰ বিশ্বাস যে তেওঁলোকে অপৰাজিত হৈ থাকিব পাৰে, যিটো সঁচাকৈয়ে এক চেষ্টা কৰিবলগা কথা । 'আমি এতিয়ালৈকে ইমান ভাল খেলিছোঁ, ছেমি ফাইনেলত হয়তো বেয়া খেল হ'ব পাৰে' বুলি কিছু আশংকা থাকিব পাৰে । তেওঁলোকে সেইবোৰ পৰিহাৰ কৰিবলৈ চেষ্টা কৰিব লাগিব আৰু যিকোনো নেতিবাচক চিন্তাক বৰ্জন কৰিব লাগিব ।" ৰিচাৰ্ডছে লগতে কয় ।
শচীন তেণ্ডুলকাৰৰ এদিনীয়া শতকৰ অভিলেখ ভংগ কৰিব পৰা বিৰাট কোহলীৰ গুৰুত্বপূৰ্ণ ভূমিকাৰ ওপৰত আলোকপাত কৰি ৰিচাৰ্ডছে কোহলীৰ স্থিতিস্থাপকতা আৰু মানসিক শক্তিক প্ৰশংসা কৰে । বিশ্বকাপৰ পূৰ্বে সমালোচনাৰ সন্মুখীন হোৱা সত্ত্বেও কোহলীৰ অসামান্য ফৰ্মে সমালোচকসকলৰ মুখ বন্ধ কৰি ৰাখিছে, তেওঁৰ অন্তৰ্নিহিত গুণ প্ৰদৰ্শন কৰিছে বুলিও তেওঁ কয় ।
আনহাতে, ৰিচাৰ্ডছে খেলৰ প্ৰতি কোহলীৰ মানসিক দৃষ্টিভংগীকো প্ৰশংসা কৰে । ইয়াক এক গুৰুত্বপূৰ্ণ কাৰক হিচাপে চিনাক্ত কৰি কয় যে ই কোহলীক তেওঁৰ সহকৰ্মীসকলৰ পৰা পৃথক কৰে । ৰিচাৰ্ডে উল্লেখ কৰে, "বিৰাট এগৰাকী মহান খেলুৱৈ আৰু তেওঁক পৃথক কৰা বিষয়টো হৈছে তেওঁৰ মানসিক শক্তি ।"
"মই বিৰাটৰ এগৰাকী ডাঙৰ অনুৰাগী । মই দীৰ্ঘদিন ধৰি প্ৰত্যক্ষ কৰি আছোঁ আৰু তেওঁ দেখুৱাই আছে যে তেওঁক কিয় সৰ্বকালৰ মহান ব্যক্তিসকলৰ মাজৰ এগৰাকী হিচাপে চিহ্নিত কৰিব লাগিব, ঠিক যেনেদৰে শচীনক কৰা হয় । এই বিশ্বকাপৰ পূৰ্বে বিৰাটে কিছু কঠিন সময়ৰ মাজেৰে পাৰ হ'বলগা হৈছিল ।" ৰিচাৰ্ডছে কয় ।
"তেওঁক অনুপ্ৰেৰণা যোগোৱা কৰ্মকৰ্তা, সহযোগী আৰু তেওঁক সমৰ্থন কৰা সকলোকে কৃতিত্ব দিব লাগিব । তেওঁৰ ফৰ্মৰ বিষয়ে বহু সমালোচনা কৰা হৈছিল, কিন্তু তেওঁ নিজৰ শীৰ্ষ ফৰ্মলৈ ঘূৰি আহিছে । তেওঁ নিশ্চিতভাৱে প্ৰমাণ কৰিছে যে তেওঁৰ প্ৰদৰ্শন শৈলী স্থায়ী । মই তেওঁৰ বাবে বহুত সুখী ।" ৱেষ্ট ইণ্ডিজৰ প্ৰাক্তন মহান খেলুৱৈগৰাকীয়ে লগতে কয় ।
