স্পৰ্টছ ডেস্ক, ১ জানুৱাৰী : অষ্ট্ৰেলিয়াৰ ভূমিত অব্য়াহত আছে ভাৰতীয় স্পীনাৰৰ চমকপ্ৰদ প্ৰদৰ্শন । ভাৰতীয় স্পীনাৰৰ হাতৰ যাদুত একপ্ৰকাৰ ধৰাশায়ী কেইবাগৰাকী অষ্ট্ৰেলিয়ান বেটছমেন । এই কথাই যেন স্বীকাৰ কৰিবলৈ বাধ্য় হল অষ্ট্ৰেলিয়ান বেটছমেনে । কেঙ্গাৰু বাহিনীৰ অন্য়তম যুৱ বেটছমেন মাৰ্নাছ লাবুচানে এক সংবাদমেলত ভাৰতীয় স্পীনাৰক প্ৰশংসা কৰা দেখা গ'ল । ভাৰতৰ অভিজ্ঞ স্পীনাৰ ৰবিচন্দ্ৰনন অশ্বিনক প্ৰশংসা কৰি তেওঁ কয় যে অশ্বিনৰ নেতৃত্বত ভাৰতীয় বলাৰসকলে প্ৰথম দুখন টেষ্টত একপ্ৰকাৰ অষ্ট্ৰেলিয়ান বেটছমেনক নিজৰ জালত বন্দী কৰি ৰাখিবলৈ সক্ষম হৈছে ।
উল্লেখ যে অষ্ট্ৰেলিয়া দলটোৱে ৪ টা ইনিংছৰ ভিতৰত ৩ টাতে ক্ৰমে ১৯১ ,১৯৫ আৰু ২০০ ৰাণত আটাইকেইটা উইকেট হেৰুৱাইছে আৰু অশ্বিনে দুবাৰ স্মিথ আৰু এবাৰ লাবুচানেক আউট কৰি মুঠ ১০ টা উইকেট লবলৈ সক্ষম হৈছে ।
২৬ বছৰীয়া লাবুচানে সংবাদমেলত প্ৰশিক্ষক ৰবি সাস্ত্ৰীক উদ্দেশ্য়ি কয় যে তেওঁৰ দলত কেৱল এগৰাকী ভাল বলাৰে নহয় এগৰাকী ভাল বিচাৰকও আছে । অশ্বিনক প্ৰশংসা কৰি তেওঁ কয় যে বাস্তৱ ৰূপত অশ্বিন সম্পূৰ্ণ প্ৰস্তুত হোৱাৰ লগতে এগৰাকী চতুৰ খেলুৱৈ হ'বলৈ চেষ্টা কৰিছে । ইয়াৰওপৰি অশ্বিনৰ গতি আৰু স্পীনত অষ্ট্ৰেলিয়া দলটো ধৰাশায়ী হোৱাৰ লগতে তেওঁ নিজেও কেইবাবাৰ অশ্বিনৰ জালত পৰিছে বুলি স্বীকাৰ কৰিলে । সংবাদমেলত তেওঁ কয় যে ভাৰতীয় বলাৰ সকলৰ আক্ৰমণে ৰাণৰ গতিটো প্ৰভাৱ পেলাইছে যাৰ বাবে দুয়োখন টেষ্টতে অষ্ট্ৰেলিয়াই ২০০তকৈ অধিক ৰাণ কৰিবলৈ সক্ষম নহ'ল ।
সম্পূৰ্ণ অনুশাসনমূলক বলিঙৰ লগতে ভাৰতীয় দলৰ স্পীনাৰ আৰু পেচবলাৰৰ সঠিক লাইন-লেংথৰ বাবে অষ্ট্ৰেলিয়াৰ বেটছমেনক বেকফুটত ৰাখিছে বুলিও স্বীকাৰ কৰে কেঙ্গাৰু বাহিনীৰ অন্য়তম বেটছমেন মাৰ্নাছ লাবুচানেই ।
লগতে পঢ়ক :2020 বৰ্ষৰ ক্ৰীড়াক্ষেত্ৰত অসমৰ সাফল্য
