স্পৰ্টছ ডেস্ক, 9 জুন : 8 জুলাইৰ পৰা ইংলেণ্ডত আৰম্ভ হ'বলগা তিনিখনীয়া টেষ্ট ছিৰিজৰ বাবে এন্টিগুৱাৰ পৰা ইংলেণ্ডলৈ ৰাওনা হৈছে ৱেষ্ট ইণ্ডিজ ক্ৰিকেট দল ৷
ৱেষ্ট ইণ্ডিজ ক্ৰিকেট বৰ্ডৰ (CWI) মতে, দুখন চাৰ্টাৰ্ড বিমানেৰে দেশৰ বিভিন্ন অঞ্চলৰ পৰা খেলুৱৈ আৰু অন্যান্য কৰ্মচাৰীসকলক লৈ সোমবাৰে সন্ধিয়া সময়ত দলটো ইংলেণ্ডলৈ উৰা মাৰে ৷
এক প্ৰেছ বিজ্ঞপ্তিত CWI য়ে কয়, "যোৱা সপ্তাহত ভ্ৰমণকাৰী দলৰ সকলো সদস্যই COVID-19 পৰীক্ষণ চলায় আৰু সকলোৰে ফলাফল নেগেটিভ পোৱা গৈছে ৷"
মঙলবাৰে মানচেষ্টাৰত উপস্থিত হোৱাৰ পাচতে দলটোক পুনৰ COVID-19 পৰীক্ষা কৰা হ'ব ৷ উল্লেখ্য যে, এই ছিৰিজটো জৈৱ সুৰক্ষিত (bio-secure) পৰিৱেশত আয়োজন কৰা হ'ব ৷
Bio-secure প্ৰটক'লৰ ফলত খেল অনুষ্ঠিত কৰা স্থানৰ পৰা কোনো লোক বাহিৰলৈ যাব নোৱাৰিব ৷ সেয়েহে কিছু সংখ্যক সংৰক্ষিত খেলুৱৈয়ে ট্ৰেইনেৰে ভ্ৰমণ কৰি টেষ্ট স্কোৱাড গঠন কৰাত সহায় কৰিব আৰু কোনো খেলুৱৈ আঘাতপ্ৰাপ্ত হ'লে স্থানান্তৰ কৰা সন্দৰ্ভত নিশ্চিতি প্ৰদান কৰিব ৷
এই সম্পৰ্কত ৱেষ্ট ইণ্ডিজৰ অধিনায়ক জেছন হ'ল্ডাৰে কয়, "যিহেতু আমি ইংলেণ্ড ভ্ৰমণ কৰিছো সেয়েহে এয়া ক্ৰিকেট আৰু ক্ৰীড়াক্ষেত্ৰৰ বাবে এক বৃহৎ পদক্ষেপ হ'ব ৷ এয়া ক্ৰীড়াক্ষেত্ৰৰ বাবে এক নতুন পৰিক্ৰমা ৷ এই ভ্ৰমণ নিশ্চিত হোৱাৰ পাচত অনুৰাগীৰ পৰা লাভ কৰা সমৰ্থন আৰু শুভকামনাৰ বাবে মই অত্যন্ত সুখী ৷ এয়া উৎসাহজনক ৷"
উল্লেখ্য যে, ছাউথেম্পটনত (8-12 জুলাই) প্ৰথম টেষ্ট, অল্ড ট্ৰেফৰ্ডত (16-20 জুলাই) দ্বিতীয় টেষ্ট আৰু মানচেষ্টাৰত (24-28 জুলাই) তৃতীয় টেষ্ট অনুষ্ঠিত হ'ব ৷