নিউজ ডেস্ক, 10 অক্টোবৰ : ৰাষ্ট্ৰীয় পৰ্যায়ৰ ৰিয়েলিটি শ্ব’ Super Dancer ত উজলিছে অসম সন্তান ফ্ল’ৰিনা গগৈ ৷ নৃত্যকেন্দ্ৰিক ৰিয়েলিটি শ্ব’ Super Dancer Chapter 4 ৰ বিজয়ীৰ খিতাপ লাভ কৰিবলৈ সক্ষম হৈছে যোৰহাটৰ জী ফ্ল’ৰিনাই ৷ শনিবাৰে আছিল কিডছ ডান্স ৰিয়েলিটি শ্ব' Super Dancer Chapter 4 ৰ গ্ৰেণ্ড ফাইনেলখনি ৷
বিজয়ী ফ্ল’ৰিনাই উদ্যোক্তাসকলৰ পৰা লাভ কৰে এটা ট্ৰফীসহ 15 লাখ টকাৰ এখন চেক ৷ আনকি Super Dancer ফ্ল’ৰিনাৰ গুৰু তুষাৰ ছেট্টীকো নগদ ৫ লাখ টকাৰে পুৰস্কৃত কৰা হয় ৷ যাক লৈ এতিয়া আনন্দিত হৈ পৰিছে ফ্ল’ৰিনা আৰু তুষাৰৰ অনুৰাগীসকল ৷
ফ্ল’ৰিনা-তুষাৰৰ অনুৰাগীসকলে মৰমতে গুৰু-শিষ্যৰ এই যুটিটোক ‘ফ্ল’টাচ’ বুলি নামাংকন কৰিছে ৷
ডান্স ৰিয়েলিটি শ্ব' Super Dancer Chapter 4 ৰ গ্ৰেণ্ড ফাইনেলত বিচাৰক হিচাপে আছিল বলীউডৰ অভিনেত্ৰী শিল্পা ছেট্টী কুন্দ্ৰা, কৰিঅ’গ্ৰাফাৰ গীতা কাপুৰ আৰু বলীউডৰ ছবি পৰিচালক অনুৰাগ বসু ৷ এই ডান্স ৰিয়েলিটি শ্ব’টোৰ আঁত ধৰোতা হিচাপে আছিল ঋত্বিক ধনজানি আৰু পৰিতোষ ত্ৰিপাঠী ৷
ফ্ল’ৰিনাৰ উপৰিও Super Dancer Chapter 4 ৰ ফাইনেলিষ্টসকল হৈছে সঞ্চিত চানানা, প্ৰুথভিৰাজ কংগাৰী, এষা মিশ্ৰা আৰু নীৰজা তিৱাৰী ।
লগতে পঢ়ক : উত্তৰ-পূবত আয়ুষভিত্তিক উদ্যোগৰ যথেষ্ট সম্ভাৱনা আছে
