নিউজ ডেস্ক, ২১ জানুৱাৰী: আমেৰিকাৰ প্ৰথমগৰাকী মহিলা উপ-ৰাষ্ট্ৰপতি হিচাপে শপত গ্ৰহণ কৰি ভাৰতীয় মূলৰ কমলা হেৰিছে নতুন ইতিহাস লিখিলে । বুধবাৰে শপত বাক্য পাঠ কৰিয়েই দেশৰ হৈ সেৱা আগবঢ়াবলৈ সাজু বুলি মন্তব্য কৰে হেৰিছে । ভাৰতীয় মূলৰ কৃষ্ণাংগ আমেৰিকান প্ৰথমগৰাকী মহিলা উপ-ৰাষ্ট্ৰপতি কমলা হেৰিছে সংযুক্ত ৰাষ্ট্ৰৰ সংবিধানৰ শপত খায় সকলো শত্ৰুৰ বিৰুদ্ধে দেশ ৰক্ষা কৰিব আৰু একান্ত স্বচ্ছ আৰু নিষ্ঠাৰে নিজৰ কৰ্তব্যৰ লগতে দেশৰ সেৱা আগবঢ়াই নিব বুলি কয় ।
শপত গ্ৰহণৰ পূৰ্বে মাতৃৰ কষ্ট আৰু সাধনাৰ বাবে আজি এই পৰ্যায়ত উপনীত হ'বলৈ সক্ষম বুলি হেৰিছে টুইট কৰে ।
৪৯ সংখ্যক হিচাপে আমেৰিকাৰ উপ-ৰাষ্ট্ৰপতি কমলা হেৰিছ আৰু মাৰ্কিন যুক্ত ৰাষ্ট্ৰৰ ৪৬ সংখ্যক ৰাষ্ট্ৰপতি হিচাপে জ'বাইডেনে শপত গ্ৰহণৰ লগে লগে অন্ত পৰিল মাৰ্কিন ৰাজনীতিৰ আটাইতকৈ সংঘাতপূৰ্ণ ট্ৰাম্প প্ৰশাসনৰ কাৰ্যকাল । উল্লেখ্য যে, ৬১ বছৰীয়া মাইক পেন্সৰ উপ-ৰাষ্ট্ৰপতি পদৰ দায়িত্বভাৰ গ্ৰহণ কৰে হেৰিছে ।
কমলা হেৰিছৰ পিতৃ আছিল জামাইকান মূলৰ অৰ্থনীতিবাদ তথা ষ্টেনফ'ৰ্ড বিশ্ববিদ্যালয়ৰ প্ৰফেছৰ ড'নাল্ড হেৰিছ আৰু মাতৃ বায়'মেডিকেল বিজ্ঞানী চেন্নাইৰ শ্যামলা গোপালন । ১৯৬৪ চনত কেলিফৰ্ণিয়াৰ অ'কলেণ্ডত জন্ম গ্ৰহণ কৰিছিল হেৰিছে । বে' এলেকাত ডাঙৰ-দীঘল হৈছিল যদিও পৰিয়ালৰ সৈতে সঘনাই ভাৰতৰে যাত্ৰা অব্যাহত ৰাখিছিল হেৰিছে । ১২ বছৰ বয়সতে হেৰিছ আৰু তেওঁৰ ভগ্নী মায়াই মাতৃৰ সৈতে কানাডাৰ মন্ত্ৰিয়াললৈ গৈছিল । উল্লেখ্য যে, কৰ্মসূত্ৰে হেৰিছৰ মাতৃয়ে মন্ত্ৰিয়ালত আছিল । ২০০৯ চনত মাতৃ শ্যামলাৰ কৰ্কট ৰোগত আক্ৰান্ত হৈ মৃত্যু হৈছিল ।
১৯৮৬ চনত হাৱাৰ্ডৰ পৰা স্নাতক ডিগ্ৰী গ্ৰহণ কৰি ১৯৮৯ চনত কেলিফৰ্ণিয়া বিশ্ববিদ্যালয়ৰ হেষ্টিং কলেজ অফ অফ দ্যা ল'ৰ পৰা স্নাতকোত্তৰ ডিগ্ৰী গ্ৰহণ কৰে । পৰৱৰ্তী সময়ত জিলা সহায়িকা এটৰ্ণী হিচাপে আলামেডাৰ প্ৰচিকিউটৰ (অধিবক্তা)ৰ কাৰ্যালয়ত যোগদান কৰিছিল আৰু তাৰ পৰাই ৰাজনৈতিক যাত্ৰাৰ আৰম্ভণি কৰিছিল ।
২০০৩ চনত চেন ফ্ৰান্সিস্ক' জিলা এটৰ্ণীৰ বাবে প্ৰথমবাৰৰ বাবে জয়লাভ কৰে । ২০১০ চনত কেলিফৰ্ণিয়াৰ এটৰ্ণী জেনেৰেল হিচাপে নিৰ্বাচিত হোৱা প্ৰথমগৰাকী ব্লেক ওমেন কমলা হেৰিছ ।
কমলা হেৰিছৰ এই যাত্ৰা কেৱল আমেৰিকাবাসীৰে সপোন হয় বৰঞ্চ লাখ লাখ লোকৰ এই সপোন তেওঁৰ নেতৃত্বত এখন সুস্থ গণতান্ত্ৰিক দেশ গঢ় লৈ উঠা । সকলোৰে সপোন যেন সাকাৰ হওঁক সেয়াই কামনা সকলোৰে ।
লগতে পঢ়ক:ভূমিকম্পই বিধ্বস্ত কৰা ইণ্ডোনেছিয়াত পুনৰ খুলিছে ব্যৱসায়িক প্ৰতিষ্ঠান
