শিৱসাগৰ, 13 অক্টোবৰ : আস্থা আৰু ভক্তিৰ প্ৰতীক শিৱসাগৰৰ দেৱী দৌলৰ আন এক সম্প্ৰীতিৰ পৰম্পৰা আছে । প্ৰতি বছৰে দুৰ্গা পূজাৰ নৈবেদ্যৰ এক অংশ মুছলমান দৌল্লা পৰিয়াললৈ আগবঢ়াই অহা হয় । দৌল প্ৰতিষ্ঠাৰ কালৰে পৰা শিৱসাগৰৰ দৌল্লা পৰিয়ালৰ পূৰ্বপুৰুষে দেৱী দৌলত ধাক বজাই আহিছিল ।
যাৰ বাবে তেতিয়াৰ দিনতে দৌল্লা পৰিয়ালে দুৰ্গা পূজাৰ ভাগ লাভ কৰিছিল । পৰৱৰ্তী সময়ত দৌলত ধাক বজোৱাৰ পৰম্পৰা নাইকিয়া হ'ল যদিও দৌল্লা পৰিয়ালে পূজাৰ ভাগ পোৱাৰ পৰম্পৰা অব্যাহত থাকিল ।
বিগত সময়ছোৱাত দেৱীলৈ বুলি আগবঢ়োৱা ছাগলী দৌল্লা পৰিয়াললৈ প্ৰদান কৰা হৈছিল যদিও আজিৰ দিনত এক নৈৱেদ্যৰ শৰাই আগবঢ়াই । প্ৰজন্মৰ পাছত প্ৰজন্ম ধৰি চলি অহা এই সম্প্ৰীতিৰ নিদৰ্শনত এইবাৰ দৌল্লা পৰিয়ালৰ আন এক নতুন প্ৰজন্মই অংশ লয় । বহু বছৰ ধৰি দৌলৰ পূজাৰ ভাগ গ্ৰহণ কৰি অহা দৌল্লা পৰিয়াল জেষ্ঠ মণিৰুদ দৌল্লাৰ মৃত্যুৰ পাছত তেওঁ পাছৰ প্ৰজন্মই এইবাৰ পালন কৰে এই পৰম্পৰা ।
দৌল্লা পৰিয়ালৰ নতুন প্ৰজন্ম মিলি বুধবাৰে দৌল উন্নয়ন সমিতিৰ পৰা দেৱীলৈ আগবঢ়োৱা অষ্টমীৰ প্ৰসাদ গ্ৰহণ কৰে । দৌল সমিতিক এই পৰম্পৰা অব্যাহত ৰখাৰ বাবে ধন্যবাদ জ্ঞাপন কৰাৰ লগতে নতুন প্ৰজন্মই এনে পৰম্পৰা সন্দৰ্ভত জ্ঞাত হৈ ইতিহাসক সোঁৱৰণ কৰা উচিত বুলি তেওঁ কয় ।
দৌল্লা পৰিয়ালৰ লগতে পৰম্পৰা অনুসৰি বৰপাত্ৰগোঁহাই পৰিয়াললৈ দৌল উন্নয়ন সমিতিয়ে প্ৰসাদৰ শৰাই আগবঢ়াই । ধৰ্মীয় বিশ্বাসৰ মাজত শান্তি আৰু সম্প্ৰীতিৰ শতিকা পুৰণি পৰম্পৰা এইবাৰ দুৰ্গা পূজাত নতুন প্ৰজন্মৰ দ্বাৰা আৰম্ভ হ'ল । আৰম্ভ হ'ল প্ৰেমৰ এক নতুন যাত্ৰা । এই যাত্ৰাৰ সাক্ষী হ'ল ইতিহাস ।
লগতে পঢ়কঃ বোকাখাতত বলিৰ বাবে আগবঢ়োৱা 2 ম'হ মেলি দিয়া হ'ব কাজিৰঙাত
