মৰিয়নী, 17 জুন : আগন্তুক বিধানসভা নিৰ্বাচনৰ বাবে হাতত মাথো কেইটামান মাহ বাকী । নিৰ্বাচনী কুচকাৱাজ নামি পৰিছে ৰাজনৈতিক দল সমূহ । মহামাৰী কৰ'ণাৰ আতংকৰ মাজতে দলৰ জনসম্পৰ্ক কাৰ্যসূচীৰ বাবে মৰিয়নীত উপস্থিত হয় শ্ৰমমন্ত্ৰী সঞ্জয় কিষান । বিজেপি দলে সমগ্ৰ দেশতে আৰম্ভ কৰা জনসম্পৰ্ক কাৰ্যসূচীৰ সফল ৰূপায়ন কৰিব বাবে মৰিয়নীত উপস্থিত হয় ৰাজ্যৰ শ্ৰমমন্ত্ৰীগৰাকী ।
অতীজৰে পৰা কংগ্ৰেছৰ দুৰ্গৰূপে খ্যাত মৰিয়নী সমষ্টিৰ ৰাইজৰ মন জয় কৰিবৰ বাবে মন্ত্ৰীগৰাকীয়ে বহুকেইজন শিক্ষাগুৰু, সমাজকৰ্মী, ব্যৱসায়ী আৰু শ্ৰমিকৰ ঘৰত উপস্থিত হৈ আলোচনাত মিলিত হয় ৷ তাৰোপৰি মৰিয়নী সমষ্টিৰ কেইবাটাও উপপথৰ আধাৰশিলা স্থাপন কৰে । অন্যহাতে মন্ত্ৰীগৰাকীয়ে আয়োজন কৰা সভাসমূহত দেখা নগ'ল কোনোধৰণ সামাজিক দূৰত্ব । সভাসমূহত উপস্থিত সৰ্বসাধাৰণ ৰাইজৰ বাদে বিজেপিৰ কোনো এজন কৰ্মকতাই মাক্স পৰিধান কৰাও দেখা নগ'ল ।
