নিউজ ডেস্ক, ১৪ ডিচেম্বৰ : উত্তৰ প্ৰদেশৰ ঝান্সি চিকিৎসা মহাবিদ্যালয়ৰ এক আচৰিত ঘটনা পোহৰলৈ আহিছে । বুধবাৰে চিকিৎসা মহাবিদ্যালয়খন পৰিষ্কাৰ কৰাৰ সময়ত নৰমুণ্ড, কংকাল আৰু হাড়ৰ ভাণ্ডাৰ উদ্ধাৰ হয় । এই ঘটনাৰ পিছতে তীব্ৰ চাঞ্চল্যৰ সৃষ্টি হয় । আনহাতে, বিষয়টো সন্দৰ্ভত তথ্য লাভ কৰাৰ লগে লগে প্ৰাক্তন কেন্দ্ৰীয় মন্ত্ৰী প্ৰদীপ জৈন আদিত্যৰ নেতৃত্বত শ শ কংগ্ৰেছ কৰ্মীয়ে চিকিৎসা মহাবিদ্যালয়খনৰ মৰণোত্তৰ পৰীক্ষা গৃহৰ বাহিৰত প্ৰতিবাদ আৰম্ভ কৰে । প্ৰাক্তন কেন্দ্ৰীয় মন্ত্ৰীজনে চিকিৎসা মহাবিদ্যালয়খনত মানৱ অংগৰ চোৰাং সৰবৰাহৰো অভিযোগ উত্থাপন কৰে ।
উল্লেখ্য যে ঝান্সিৰ মহাৰাণী লক্ষ্মীবাই চিকিৎসা মহাবিদ্যালয়ৰ মৰণোত্তৰ পৰীক্ষা গৃহত মৃতদেহৰ পৰা চকু আৰু অংগ চুৰিৰ ঘটনা এতিয়াও মানুহৰ মনত সজীৱ হৈ আছে । তাৰ মাজতে বুধবাৰে চিকিৎসা মহাবিদ্যালয়খন পৰিষ্কাৰ কৰাৰ সময়ত নৰমুণ্ড, কংকাল আৰু হাড় উদ্ধাৰৰ ফলত এক চাঞ্চল্যৰ সৃষ্টি হৈছে । আনহাতে, এই ঘটনাত মৰণোত্তৰ পৰীক্ষাৰ বাবে অহা লোকসকল আতংকিত হৈ পৰে । ইফালে দুটা মানৱ কংকাল আৱিষ্কাৰ হোৱাৰ তথ্য পোৱাৰ লগে লগে প্ৰাক্তন কেন্দ্ৰীয় মন্ত্ৰী প্ৰদীপ জৈন আদিত্যৰ নেতৃত্বত শ শ কংগ্ৰেছ কৰ্মী চিকিৎসা মহাবিদ্যালয়খনৰ মৰণোত্তৰ পৰীক্ষা গৃহৰ বাহিৰত উপস্থিত হয় ।
প্ৰাক্তন কেন্দ্ৰীয় মন্ত্ৰী প্ৰদীপ জৈন আদিত্যই মানৱ অংগক লৈ ব্যৱসায় চলি থকাৰ অভিযোগ তুলি সৰৱ হৈ পৰে । তেওঁ নৰমুণ্ড আৰু মানৱ দেহৰ অৱশেষ উদ্ধাৰক 'অতি গুৰুতৰ বিষয়' আৰু ইয়াৰ সৈতে মানৱ অংগৰ চোৰাং ব্যৱসায় জড়িত হৈ থকাৰো অভিযোগ কৰে । তেওঁ লগতে বিষয়টোৰ এক উচিত তদন্ত আৰু মৰণোত্তৰ পৰীক্ষা গৃহৰ পৰা মানৱ অংগ সৰবৰাহৰ ৰেকেটক পোহৰলৈ অনাৰো দাবী জনায় । ইয়াৰ উপৰি উদ্ধাৰ হোৱা মানৱ শৰীৰ অৱশেষৰ ডিএনএ পৰীক্ষাৰো দাবী জনায় । অৱশ্যে এই মানৱ কংকাল ক'ৰ পৰা আহিল, কাৰ আৰু কিমান দিন পুৰণি তাক লৈ এতিয়া ৰহস্যৰ সৃষ্টি হৈছে ।
উল্লেখ্য যে ৭ ডিচেম্বৰত মহাৰাণী লক্ষ্মীবাই চিকিৎসা মহাবিদ্যালয়ৰ মৰণোত্তৰ পৰীক্ষা গৃহত ৰখা ব্যৱসায়ী সঞ্জয় জৈনৰ চকু কিবা জন্তুৱো খাইছিল । এই বিষয়টো গুৰুত্বসহকাৰে লৈ চিকিৎসা মহাবিদ্যালয় প্ৰশাসনে মৰণোত্তৰ পৰীক্ষাৰ ঘৰটো পৰিষ্কাৰ কৰি আছে । বুধবাৰে পৰিষ্কাৰ কৰাৰ সময়ত কৰ্মচাৰীসকলে মৰণোত্তৰ পৰীক্ষা গৃহত এটা মানৱ কংকাল, নৰমুণ্ড আৰু হাড় উদ্ধাৰ কৰে । যাৰ ফলত মৰণোত্তৰ পৰীক্ষা গৃহত আত্মীয়ৰ মৰণোত্তৰ পৰীক্ষা কৰিবলৈ অহা লোকসকলৰ মাজত আতংক বিয়পি পৰে ।
আনহাতে, এই ঘটনা সংঘটিত হোৱাৰ পিছত চিকিৎসা মহাবিদ্যালয়খনৰ চিএমএছ ডাঃ শচীন মহোৰে লগে লগে গৈ মৰণোত্তৰ পৰীক্ষা গৃহত উপস্থিত হয় । তেওঁ কয় যে মৰণোত্তৰ পৰীক্ষা গৃহত কংকাল পোৱাটো এটা গুৰুতৰ বিষয় । ইয়াৰ পুংখানুপুংখভাৱে অনুসন্ধান কৰা হ'ব আৰু উপযুক্ত ব্যৱস্থা লোৱা হ'ব ।
লগতে পঢ়ক :আৰক্ষী আৰু নক্সালবাদীৰ মাজত সংঘৰ্ষ, এনকাউণ্টাৰত নিহত দুধৰ্ষ নক্সালবাদী
