আগৰতলা, 28 ডিচেম্বৰ : নিচাযুক্ত সামগ্ৰীৰ অবৈধ সৰবৰাহ অব্যাহত আছে ত্ৰিপুৰাত ৷ সোমবাৰে উত্তৰ ত্ৰিপুৰা জিলাৰ আৰক্ষীয়ে অতৰ্কিতে অভিযান (Operation against Contraband items by tripura Police) চলায় এনে ধৰণৰ নিচাযুক্ত সামগ্ৰীৰ বিৰুদ্ধে ৷ আৰক্ষীৰ এই অভিযানত জব্দ হৈছে প্ৰায় 3 কোটি মূল্যৰ নিচাযুক্ত সামগ্ৰী (Tripura police seized Contraband items) ৷ ৰাজ্যখনৰ সীমান্তৱৰ্তী অঞ্চলত জব্দ কৰা হৈছে এই নিচাযুক্ত সামগ্ৰী ৷
ত্ৰিপুৰাৰ এই সীমান্তটোৱে ভৌগোলিক মানচিত্ৰত অসম আৰু মিজোৰামক সংলগ্ন কৰিছে ৷ সংবাদ মাধ্যমৰে হোৱা বাৰ্তালাপত জিলা আৰক্ষী অধীক্ষক ভানুপাদা চক্ৰৱৰ্তীয়ে প্ৰকাশ কৰা অনুসৰি, আৰক্ষীয়ে সোমবাৰৰ দিনটোত জিলাখনৰ দুই পৃথক স্থানত এই অভিযান চলাইছিল ৷ এই অভিযানত আৰক্ষীয়ে কোটি টকা মূল্যৰ নিচাযুক্ত সামগ্ৰী জব্দ কৰাৰ লগতে তিনিজন লোকক আটক কৰে ৷
আৰক্ষীয়ে গোপন সূত্ৰৰ পৰা লাভ কৰা তথ্যৰ ভিত্তিত চূড়াইবাৰী আৰু পানীসাগৰ নামৰ দুই অঞ্চলত চলাইছিল অভিযান ৷ সীমান্তৱৰ্তী অঞ্চল চূড়াইবাৰীত পোনতে পৰে অভিযানকাৰী দলৰ হাতোৰা ৷ আৰক্ষীৰ দলটোৱে ত্ৰিপুৰাৰ পৰা অসম অভিমুখী NL ০১ AC ৮৬৭৭ নম্বৰৰ এখন ট্ৰাকৰ পৰা প্ৰায় ২৫,০০০ বটল ফেঞ্চিডাইল জব্দ কৰে ৷ ঘটনাৰে জড়িত থকা বিহাৰৰ গয়াৰ চাবাজ আলী (24) নামৰ লোকজনকো কৰায়ত্ত কৰে আৰক্ষীয়ে ৷
পুনৰ আৰক্ষীয়ে পানীসাগৰত অভিযান চলাই এখন বাহনৰ পৰা জব্দ কৰে ৪,৬৫৫ বটল কফ চিৰাপৰ লগতে ৩১,৮২৪ টা নিচাযুক্ত টেবলেট ৷ পানীসাগৰৰ পৰা আৰক্ষীয়ে আস্কিব আহমেদ আৰু আমিৰ আহমেদ নামৰ দুই ভাতৃক কৰায়ত্ত কৰাৰ কথা জানিব পৰা গৈছে ৷
মুঠৰ ওপৰত সোমবাৰৰ দিনটোত ত্ৰিপুৰা আৰক্ষীয়ে প্ৰায় 3 কোটি মূল্যৰ নিচাযুক্ত সামগ্ৰীৰ লগতে দুখন বাহন জব্দ কৰে ৷ তদুপৰি ঘটনাত জড়িত থকাৰ অভিযোগত আটক কৰে তিনিগৰাকীকৈ লোকক ৷ ইতিমধ্যে তিনিওগৰাকী লোকৰ বিৰুদ্ধে আৰক্ষীয়ে নিজাববীয়াকৈ গোচৰ ৰুজু কৰিছে ৷
লগতে চাওক: উগ্ৰপন্থী সংগঠনত যোগদান কৰিবলৈ চেষ্টা চলোৱাৰ সন্দেহত তিনি যুৱক আটক
