নেশ্যেনেল ডেস্ক, 29 ডেস্ক: "শিল্পী মই তিনিও কালৰ, আদিতেই যাত্ৰা কৰি অনাদিলৈ যাওঁ ৷" জীৱন সংগ্ৰামৰ পথ মন্থৰ নহয় । আচলতে, এক কথাত ক'বলৈ গ'লে এগৰাকী শিল্পীৰ জীৱন কোনোদিনেই সহজ নহয় ৷ এগৰাকী শিল্পীৰ কামেৰে ইতিহাস সমৃদ্ধ হয়, এটা জাতিৰ জাতীয় জীৱনত শিল্পীৰ এক বিশেষ স্থান আছে ৷ আজি আমি আপোনালোকক এনে এগৰাকী শিল্পীৰ কথা ক’বলৈ ওলাইছো, যিগৰাকী শতবৰ্ষ গৰকা শিল্পীয়ে পদ্মশ্ৰী বঁটাৰ বাবে নাম ঘোষণা হোৱাৰ পিচতো লুকুৱাব নোৱাৰিলে নিজৰ দুখ ৷
শেহতীয়াকৈ চলিত বৰ্ষত দেশৰ বিভিন্ন বৃত্তি আৰু বিভিন্ন ক্ষেত্ৰৰ পৰা 91 গৰাকী পদ্মশ্ৰী বঁটা বিজয়ীৰ তালিকা ঘোষণা কৰা হৈছে (Padma Shri award announcement)৷ ইয়াৰ ভিতৰত পশ্চিম বংগৰ জলপাইগুৰি জিলাৰ 102 বছৰীয়া চাৰিন্দা বাদক মঙলা কান্তি ৰয়ৰ (Padma awardee Mangala Kanti Roy) নামো এই তালিকাত উল্লেখ আছে ৷
এই খবৰ পোৱাৰ পিচত ৰয়ে আবেগিক হৈ কয়, "যেতিয়া মই এই বাদ্যযন্ত্ৰটো বজাওঁ তেতিয়া মই নিজকে সজীৱ অনুভৱ কৰোঁ ৷ মোৰ চাৰিন্দাখনে মোক অপৰিসীম সন্তুষ্টি প্ৰদান কৰে । মই এই অনুভৱ শব্দৰে বৰ্ণনা কৰিব নোৱাৰো । চাৰিন্দা বাদনৰ সময়ত মই নিজকে পৃথিৱীৰ আটাইতকৈ ধনী ব্যক্তি যেন অনুভৱ কৰোঁ ৷"
লগতে ৰয়ে কয়, "পলমকৈ হ’লেও মই জীৱিত অৱস্থাত এই স্বীকৃতি লাভ কৰি মই সুখী অনুভৱ কৰিছোঁ । মই পাঁচ বছৰ বয়সৰ পৰাই চাৰিন্দা বজাই আহিছোঁ । মই এই বাদ্যযন্ত্ৰখনৰ সৈতে সমগ্ৰ দেশ ভ্ৰমণ কৰিছো ৷ প্ৰত্যেকগৰাকী লোকৰ সন্মুখত মই এই বাদ্যযন্ত্ৰ প্ৰদৰ্শন কৰিছো । অৱশ্যে এই কলাই মোক কেতিয়াও বিত্তীয় সুৰক্ষা প্ৰদান কৰা নাছিল ৷ মই বহু সময়ত প্ৰত্যাহ্বানমূলক অৰ্থনৈতিক পৰিস্থিতিত জীয়াই থাকিব লগা হৈছিল ৷"
74 সংখ্যক গণৰাজ্য দিৱসৰ প্ৰাকমুহূৰ্তত 'কলা (লোক সংগীত) শ্ৰেণীৰ পদ্মশ্ৰী বঁটা বিজয়ীসকলৰ ভিতৰত মঙলা কান্তি ৰয়ৰ নামো ঘোষণা কৰা হৈছিল । ইয়াৰ পূৰ্বে 2017 চনত মমতা বেনাৰ্জী চৰকাৰে ৰয়ক 'বংগ ৰত্ন' সন্মানেৰে বিভূষিত কৰিছিল ৷ ৰয়ে কৰ্মশালা আৰু প্ৰদৰ্শনৰ জৰিয়তে বিগত আঠ দশক ধৰি চাৰিন্দাৰ প্ৰচাৰ আৰু সংৰক্ষণ কৰি আহিছে ।
ক’ভিড 19 মহামাৰীৰ (Covid 19 pandemic) সময়ত শ্ব’সমূহ বন্ধ হৈ যোৱাৰ বাবে ৰয়ৰ বিত্তীয় অৱস্থাৰ অধিক অৱনতি ঘটিছিল বুলি তেওঁ জানিবলৈ দিয়ে ৷ চাৰিন্দা বাদক ৰয়ৰ তিনিজন পুত্ৰ আৰু এগৰাকী কন্যা আছে ৷ তথাপিও তেওঁ অকলে থাকি বেছি ভাল পোৱা বুলি মন্তব্য প্ৰকাশ কৰে ৷
উক্ত তালিকাখনত 6 জন পদ্ম বিভূষণ, 9 জন পদ্মভূষণ আৰু 91 জন পদ্মশ্ৰী বিজয়ী আছে । বঁটা প্ৰাপ্তসকলৰ ভিতৰত 9 গৰাকী মহিলা আৰু 7 জনে মৰণোত্তৰভাৱে বঁটা লাভ কৰিব । আগন্তুক মাৰ্চ বা এপ্ৰিলৰ আশে-পাশে ৰাষ্ট্ৰপতি ভৱনত (Rashtrapati Bhawan) আয়োজিত এক অনুষ্ঠানত 106 গৰাকী লোকক ভাৰতৰ ৰাষ্ট্ৰপতি দ্ৰৌপদী মুৰ্মুৱে আনুষ্ঠানিকভাৱে এই সন্মান প্ৰদান কৰিব ৷
লগতে পঢ়ক: Mini Couple Marriage : ৰাজস্থানৰ মিনি দম্পতিৰ এখন আড়ম্বৰপূৰ্ণ বিয়া