নেশ্যনেল ডেস্ক, ২৮ ছেপ্টেম্বৰ : পৰ্যটকৰ আকৰ্ষণৰ কেন্দ্ৰস্থল হিচাপে জনাজাত ৰামোজী ফিল্ম চিটিলৈ আগবঢ়োৱা হৈছে তেলেংগানাৰ ৰাজ্যিক পৰ্যটন বঁটা । 'Best Civic Management of a Tourist Destination' শাখাত এই বঁটা লাভ কৰে ৰামোজী ফিল্ম চিটিয়ে ।
আনহাতে, ফ’ৰ ষ্টাৰ হোটেল(২০২০) ৰ শাখাত শ্ৰেষ্ঠত্বৰ বঁটা লাভ কৰে ৰামোজী গ্ৰুপৰ অধীনষ্ঠ ডলফিন গ্ৰুপৰ দ্বাৰা পৰিচালিত হোটেল চিতাৰাই । সোমবাৰে বেগমপেটস্থিত প্লাজা হোটেলত আয়োজিত বিশ্ব পৰ্যটন দিৱসৰ অনুষ্ঠানত এই বঁটা প্ৰদান কৰা হয় ।
পৰ্যটন, ক্ৰীড়া আৰু আবকাৰী মন্ত্ৰী ভি শ্ৰীনিবাস গৌড়ে এই বঁটা প্ৰদান কৰে । বিশ্ব পৰ্যটন দিৱস কেইবাটাও শিতানত বঁটা আগবঢ়োৱা হয় । এইবাৰ ৰামোজী ফিল্ম চিটিয়ে দুটাকৈ বঁটা লাভ কৰিবলৈ সক্ষম হৈছে । শ্ৰেষ্ঠ গ্ৰীণ হোটেলৰ শ্ৰেণীত তাৰামতী বাৰাদাৰীয়ে শ্ৰেষ্ঠত্বৰ বঁটা লাভ কৰে ।
দ্বিতীয় স্থানত থাকে তেলেংগানাৰ মুলুগু জিলাৰ ৰামাপ্পা মন্দিৰ চৌহদত থকা হৰিতা হোটেলে আৰু নিজামাবাদ জিলাৰ আলিসাগৰৰ হৰিতা লেক ভিউ ৰিজ’ৰ্টে তৃতীয় পুৰস্কাৰ লাভ কৰে । পৰ্যটন মন্ত্ৰী শ্ৰীনিবাস গৌড়ে কয় যে, তেলেংগানাত ২০ টাৰো অধিক ঐতিহাসিক স্থান আছে ৷ যিবোৰ স্থানক বিশ্ব পৰ্যটন মানচিত্ৰত অন্তৰ্ভুক্ত কৰিব পাৰি । বিশ্ব পৰ্যটন দিৱসৰ অনুষ্ঠানত মন্ত্ৰীগৰাকীয়ে ঘোষণা কৰে যে, তেলেংগানাত দেশৰ আন আন পৰ্যটন ক্ষেত্ৰতকৈও অধিক সুন্দৰ ঠাই আছে ।
সোমবাৰে তেলেংগানা ৰাজ্য চৰকাৰে বেগমপেটৰ প্লাজা হোটেলত আড়ম্বৰপূৰ্ণভাৱে বিশ্ব পৰ্যটন দিৱসৰ অনুষ্ঠানৰ আয়োজন কৰে । এই অনুষ্ঠানত বঁটাপ্ৰাপক, ট্ৰেভেল এজেণ্ট আৰু হোটেল মেনেজমেণ্টৰ প্ৰতিনিধিসকল উপস্থিত থাকে ।
আনহাতে, ৰাজ্যখনৰ বিভিন্ন ঐতিহাসিক স্থানসমূহৰ বিষয়ে আলোকপাত কৰি প্ৰস্তুত কৰা ভিডিঅ'ৰ এখন চিডি এই অনুষ্ঠানতে মন্ত্ৰী শ্ৰীনিবাস গৌড় আৰু পৰ্যটন উন্নয়ন নিগমৰ উপ্পলা শ্ৰীনিবাসে যুটীয়াভাৱে মুকলি কৰে । ৰাজ্যখনৰ পৰ্যটন ক্ষেত্ৰৰ উন্নয়নৰ বাবে বিশেষ প্ৰচেষ্টা চলাই থকা বিভিন্ন সংগঠনক এই অনুষ্ঠানতে বঁটা প্ৰদান কৰি ভৱিষ্যতেও এনে কাম কৰি যোৱাৰ বাবে উৎসাহ যোগোৱা হয় ।
এই বঁটাসমূহ বিগত বৰ্ষত ক'ভিড মহামাৰীৰ সংক্ৰমণ অব্যাহত থকাৰ সময়তো ঘোষণা কৰা হৈছিল । এতিয়া বিশ্ব পৰ্যটন দিৱসত বঁটাবোৰ প্ৰদান কৰা হৈছে । পৰ্যটন মন্ত্ৰীগৰাকীয়ে লগতে কয় যে, তেলেংগানা ৰাজ্যত বহুতো ঐতিহাসিক স্থান আছে । ৰাজ্য গঠনৰ পিছৰে পৰা চৰকাৰে এই ঐতিহাসিক স্থানসমূহলৈ পৰ্যটকক আকৰ্ষিত কৰাৰ বাবে বিশেষ গুৰুত্ব সহকাৰে কাম কৰি আহিছে ।
তেওঁ লগতে কয় যে, পূৰ্বৰ তুলনাত তেলেংগানালৈ অহা বিদেশী পৰ্যটকৰ সংখ্যা বৃদ্ধি পাইছে । ৰাজ্যখনৰ ৱাৰাংগল ৰামাপ্পা মন্দিৰো পৰ্যটকৰ বাবে আকৰ্ষণৰ কেন্দ্ৰস্থল । মন্ত্ৰীগৰাকীয়ে লগতে কয় যে, অধিক পৰ্যটকক আকৰ্ষিত কৰা কোম্পানীবোৰক চৰকাৰৰ তৰফৰ পৰা বিশেষ ৰেহাই দিয়া হ'ব ।
তেলেংগানা পৰ্যটন বিভাগৰ পৃষ্ঠপোষকতাত প্লাজা হোটেলত আয়োজিত অনুষ্ঠানত ৰামোজী গ্ৰুপ অৱ কোম্পানীয়ে দুটা পৰ্যটন বঁটা লাভ কৰিছে । কোম্পানীৰ প্ৰতিনিধিসকলে ২০২০ আৰু ২০২১ বৰ্ষৰ বাবে দুটাকৈ শ্ৰেষ্ঠত্বৰ বঁটা গ্ৰহণ কৰে । 'Best Civic Management of a Tourist Destination' শাখাত এক্সেলেন্স বঁটা লাভ কৰে ৰামোজী ফিল্ম চিটিয়ে ।
বঁটা গ্ৰহণ কৰি ৰামোজী ফিল্ম চিটিৰ প্ৰতিনিধিসকলে কয় যে, বিশ্ব পৰ্যটন দিৱসৰ লগতি সংগতি ৰাখি প্ৰদান কৰা এই বঁটা লাভ কৰি তেওঁলোক আনন্দিত হৈ পৰিছে ।
ৰামোজী ফিল্ম চিটিৰ উপ-সভাপতি কে ভেংকটৰত্নমে কয় যে, ক'ভিডৰ স্বাস্থ্য বিধি মানি ৰামোজী ফিল্ম চিটি চলিত বৰ্ষৰ ৮ অক্টোবৰৰ পৰা পুনৰ পৰ্যটকৰ বাবে মুকলি কৰা হ'ব । ইফালে, ডলফিন হোটেলৰ জেনেৰেল মেনেজাৰ টি আৰ এল ৰাৱে কয় যে, চিতাৰা হোটেলক বিশ্বমানৰ খোৱাৰ ব্যৱস্থা আৰু অতিথি শুশ্ৰূষাৰ সুবিধা প্ৰদান কৰাৰ বাবে সন্মানিত কৰা হৈছে ।
লগতে পঢ়ক: ক'ভিডৰ তৃতীয় ঢৌ : শিশু চিকিৎসকসকলক সাজু কৰিছে ত্ৰিপুৰাই
