তেজপুৰ, 5 মে’ : অশান্তজৰ্জৰ মণিপুৰ ৷ হিংসাৰ দাবানলে দহিছে মণিপুৰক ৷ এই হিংসাত্মক পৰিস্থিতিৰ পিচত উত্তৰ-পূব সীমান্ত ৰে’লৱেয়ে বাতিল কৰিছে মণিপুৰ অভিমুখী ৪ খন ৰে’ল (Northeast Frontier Railway cancels all Manipur bound trains) ৷ এই কথা সদৰী কৰিছে উত্তৰ পূৱ ৰে’লৱেৰ জনসম্পৰ্কৰক্ষী বিষয়াগৰাকীয়ে ৷
জানিব পৰা মতে, মণিপুৰৰ বিভিন্ন ৰে’ল ষ্টেচন লৈ যোৱা এই ৰে’লসমূহ হৈছে 12097 AGTL-KGBP জনশতাব্দী ৰে’ল, 12098 ARCL-KGBP, 05659 SCL যাত্ৰীবাহী ৰে’ল আৰু 05660 VNGP-SCL যাত্ৰীবাহী ৰে’ল ৷ আনহাতে এই ৰে’লসেৱাসমূহ শ্ৰীৰামপুৰ, জালপাইগুৰিৰ পৰা অসম হৈ মণিপুৰলৈ দৈনিক চলাচল কৰে ৷ বৰ্তমান এই ৰে’লসমূহ অসমতে ৰখোৱাৰ বাবে নিৰ্দেশ জাৰি কৰিছে উত্তৰ পূৱ ৰে’ল কৰ্তৃপক্ষই ।
উত্তৰ-পূব সীমান্ত ৰে’লৱেৰ মুখ্য জনসংযোগ বিষয়া (চিপিআৰঅ’) সব্যসাচী দে’ এ জনোৱা মতে, পৰিস্থিতি উন্নত নোহোৱালৈকে মণিপুৰত কোনো ৰে’ল প্ৰৱেশ নকৰে ৷ প্ৰথমে মণিপুৰ চৰকাৰে এই ৰে’লৰ চলাচল বন্ধ কৰাৰ পৰামৰ্শ দিছে ৷ তাৰ পিচতে ৰে’লসেৱা চলাচল বন্ধ কৰাৰ এই সিদ্ধান্ত লৈছে উত্তৰ-পূব সীমান্ত ৰে’লৱেয়ে (NFR Cancels All Manipur Bound Trains)।
লগতে পঢ়ক : Manipur Violence: অশান্ত মণিপুৰত দেখা মাত্ৰেই গুলীওৱাৰ নিৰ্দেশ ৰাজ্যপালৰ
তথ্য অনুসৰি, ইফালে ভাৰতীয় ৰে’লৱে ৰাজ্যখনত হিংসাত্মক পৰিস্থিতিৰ সৃষ্টি কৰাৰ পাচতে প্ৰথম অৱস্থাত 5 মে’ আৰু 6 মে’ৰ বাবে চাৰিখন ৰে’লৰ চলাচল বাতিল কৰা হৈছে ৷ তদুপৰি মণিপুৰৰ পৰিস্থিতি উন্নত কৰাৰ হেতুকে সেনা আৰু অৰ্ধসামৰিক বাহিনী মোতায়েন কৰা হৈছে ৷ আনকি ফ্লেগ মাৰ্চো কৰা হয় ৰাজ্যখনত ৷
অৱশ্যে ৰাজ্যখনত বৰ্তমানো জাৰি কৰা হৈ আছে সান্ধ্য আইন । বিনা কাৰণত কোনো লোকক ঘৰৰ পৰা ওলাই অহাত নিষেধাজ্ঞা প্ৰদান কৰা হৈছে ৷ আনকি পশ্চিম মণিপুৰৰ বিভিন্ন স্থানত কেথলিক গীৰ্জাসমূহ জ্বলাই দিয়া হৈছে বুলি বিভিন্ন সামাজিক মাধ্যমত প্ৰকাশ পাইছে ।
লগতে পঢ়ক : Manipur Violence update : মণিপুৰৰ হিংসাত্মক পৰিস্থিতি শান্ত কৰাত সহায় কৰিব ভাৰতীয় বায়ুসেনাই
