দেৰগাঁও, 8 মে’: দেৰগাঁৱৰ ৰাষ্ট্ৰীয় ঘাইপথত দুৰ্ঘটনাগ্ৰস্ত হ’ল বেলট বাকচ কঢ়িয়াই অনা বলেৰ' গাড়ী ৷ জানিব পৰা মতে, চৰাইদেউৰ পৰা গুৱাহাটী অভিমুখে আহি আছিল বাহনখন ৷ দণ্ডাধীশসহ আৰক্ষী আছিল বাহনখনৰ ভিতৰত ৷
উল্লেখ কৰা প্ৰয়োজন যে ক্ৰমান্বয়ে মৃত্যুদূতলৈ পৰিৱৰ্তিত হৈছে গোলাঘাট জিলাৰ দেৰগাঁওৰ ৰাষ্ট্ৰীয় ঘাইপথটো । দৈনিক দেৰগাঁৱৰ ৰাষ্ট্ৰীয় ঘাইপথত সংঘটিত হোৱা পৰিলক্ষিত হৈছে সৰু-বৰ পথ দুৰ্ঘটনা । এইবাৰ চৰাইদেউৰ পৰা দণ্ডাধীশসহ আৰক্ষী থকা এখন বলেৰ' বাহন দুৰ্ঘটনাগ্ৰস্থ হয় । চৰাইদেউৰ পৰা গুৱাহাটী অভিমুখে আহি থকা বলেৰ' বাহনখনত সমীপৰ পথৰ পৰা ওলায় অহা ডাম্পাৰে খুন্দা মৰাৰ ফলত দুৰ্ঘটনাৰ ঘটনাটো সংঘটিত হয় বুলি জানিব পৰা গৈছে । দুৰ্ঘটনাগ্ৰস্ত বলেৰ’খনৰ পঞ্জীয়ন নম্বৰ AS06-AD-9787 ৷
বলেৰ' বাহনখন বাগৰি পৰাৰ ফলত আহত হয় বলেৰ’ খনৰ ভিতৰত থকা তিনিজনকৈ আৰক্ষী কনিষ্টবলৰ লগতে দণ্ডাধীশগৰাকী । ঘটনাস্থলীত দেৰগাঁও আৰক্ষী থানাৰ এটা দল উপস্থিত হৈ স্থানীয় লোকৰ সহযোগত ততাতৈয়াকৈ আহতসকলক চিকিৎসালয়লৈ প্ৰেৰণ কৰা হৈছে ।
উল্লেখযোগ্য যে, দেৰগাঁৱৰ এই ৰাষ্ট্ৰীয় ঘাইপথটোতে জানুৱাৰী মাহত সংঘটিত হৈছিল সমগ্ৰ দেশ জোকাৰি যোৱা এক ভয়ংকৰ পথ দুৰ্ঘটনা, য’ত থিতাতে নিহত হৈছিল শিশুসহ বাৰজনকৈ লোক । গোলাঘাটৰ পৰা তিনিচুকীয়া অভিমুখে গৈ থকা এখন যাত্ৰী কঢ়িয়াই বাছৰ সৈতে বিপৰীত দিশৰ পৰা আহি থকা এখন কয়লা ভৰ্তি ট্ৰাকৰ মুখামুখি সংঘৰ্ষ হোৱাৰ ফলত সংঘটিত হৈছিল উক্ত ভয়ংকৰ পথ দুৰ্ঘটনাটো ।
বুধবাৰে সংঘটিত হোৱা এই পথ দুৰ্ঘটনাটোৰ পাছতে অঞ্চলটোত এক চেপা উত্তেজনাই বিৰাজ কৰা পৰিলক্ষিত হৈছে ।
