গুৱাহাটী, ৬ মাৰ্চ : মন্ত্ৰী পীযুষ হাজৰীকা তথা তেওঁৰ কনভয়ৰ ওপৰত এক গুৰুতৰ অভিযোগ আনিছে ৰাইজৰ দলে । পীযুষ হাজৰীকাৰ কনভয়ৰ খুন্দাত যুৱক নিহত হোৱাৰ অভিযোগ ৰাইজৰ দলৰ ।
উল্লেখ্য যে মহানগৰীৰ খানাপাৰাত কেইদিনমান পূৰ্বে মন্ত্ৰী পীযুষ হাজৰীকাৰ কনভয়ৰ খুন্দাত ৰূপম বৰা নামৰ এজন যুৱকৰ মৃত্যু হৈছিল । কিন্তু চৰকাৰী পক্ষৰ হেঁচাত এই হিট এণ্ড ৰাণৰ ঘটনাক সম্পূৰ্ণৰূপে গাপ দিবলৈ চেষ্টা কৰাৰ চেষ্টা কৰা হৈছে । এই অভিযোগ ৰাইজৰ দলৰ নেতৃবৃন্দৰ । এই সন্দৰ্ভত বুধবাৰে এক সংবাদমেল সম্বোধন কৰি ৰাইজৰ দলৰ নেতৃবৃন্দই এই ঘটনাৰ লগত মন্ত্ৰী পীযুষ হাজৰীকাৰ কনভয় জড়িত থকাৰ অভিযোগ তোলে ।
সংবাদ মাধ্যমৰ আগত ৰাইজৰ দলৰ সাধাৰণ সম্পাদক চিন্ময় বৰাই কয় যে এনে ঘটনা এয়াই প্ৰথম নহয় । ইয়াৰ পূৰ্বেও লখিমপুৰ আৰু গুৱাহাটীত দুটাকৈ দুৰ্ঘটনা সংঘটিত কৰিছিল মুখ্যমন্ত্ৰীৰ কনভয়ে । আনহাতে, বিজেপি বিধায়ক ভাস্কৰ শৰ্মাৰ গাড়ীয়েও দুৰ্ঘটনা সংঘটিত কৰিছিল । ইয়াৰ উপৰি কেইদিনমান পূৰ্বে একেগৰাকী বিধায়কৰ গাড়ীৰ খুন্দাত আঘাতপ্ৰাপ্ত হয় ৭ জনকৈ যুৱক ।
লগতে মন্ত্ৰী অতুল বৰা আৰু কেইবাজনো নেতাৰ কনভয় তথা গাড়ীৰ খুন্দাত এনে ধৰণৰ কেইবাটাও ঘটনা সংঘটিত হোৱা বুলি দাবী কৰে ৰাইজৰ দলে । এই 'হিট এণ্ড ৰাণ'ৰ ঘটনা সন্দৰ্ভত উদ্বেগ প্ৰকাশ কৰি তেওঁ প্ৰশ্ন কৰে যে মন্ত্ৰী-বিধায়কৰ বাবে যান-বাহন আৰক্ষীৰ আইন নাই নেকি ? ভিআইপি ভিভিআইপিৰ বাবে এই সংস্কৃতি কিয় বুলিও তেওঁ আৰক্ষীক প্ৰশ্ন কৰে ।
এইক্ষেত্ৰত 'হিট এণ্ড ৰাণ' আইনখন মন্ত্ৰী-বিধায়কৰ বাবেও প্ৰযোজ্য হ'ব লাগে বুলি উল্লেখ কৰি ৰাইজৰ দলৰ নেতাগৰাকীয়ে মন্ত্ৰী-বিধায়কৰ কাৰণে যদি আইনৰ এই হাতখন খোলা থাকে, তেন্তে জনসাধাৰণৰ বাবে কঠোৰ আইন কিয় বুলি চাৰকাৰলৈ প্ৰশ্ন উত্থাপন কৰে । আনহাতে, বীমা উকলি যোৱা বিধায়ক ভাস্কৰ শৰ্মাৰ গাড়ীয়ে দুৰ্ঘটনা সংঘটিত কৰাৰ পিচতো আজিলৈকে তাৰ তদন্ত কিয় নহ'ল বুলিও প্ৰশ্ন কৰে ৰাইজৰ দলৰ নেতৃত্বই ।
লগতে পঢ়ক :কংগ্ৰেছী নেতাক হাৰাশাস্তি কৰিব বিচাৰিছে চৰকাৰে: দেৱব্ৰত শইকীয়া
