গোৱালপাৰা,৭ মে': ৰাজ্যত অন্ত পৰিল লোকসভা নিৰ্বাচনৰ তিনিটা পৰ্যায়ৰ ভোটগ্ৰহণ । মঙলবাৰে ৫ বজাৰ লগে লগে অন্ত পৰে তৃতীয় পৰ্যায়ৰ ভোটগ্ৰহণ । বিশেষভাৱে সক্ষম ভোটাৰৰ পৰা অশীতিপৰ ভোটাৰেও সাব্যস্ত কৰে ভোটাধিকাৰ । পিছে ইয়াৰ মাজতে এটা ভোটগ্ৰহণ কেন্দ্ৰৰ পৰা অহা খবৰে চকু সেমেকাই তুলিছে সকলোৰে । ভোটাধিকাৰ সাব্যস্ত কৰিয়েই ইহ সংসাৰৰ পৰা মেলানি মাগিলে এগৰাকী ভোটাৰে ।
গোৱালপাৰা জিলাত সংঘটিত হৈছে এই ঘটনা । দেশৰ গণতান্ত্রিক অধিকাৰ সাব্যস্ত কৰিবলৈ গৈ কৰুণ মৃত্যুক সাৱটিলে এগৰাকী মহিলাই । গোৱালপাৰা জিলাৰ জলেশ্বৰ সমষ্টিৰ ২০৮ নং জলডোবা প্ৰাথমিক বিদ্যালয়ৰ ভোটগ্ৰহণ কেন্দ্রত সংঘটিত হৈছে এই কৰুণ ঘটনা । মৃত মহিলা গৰাকী দামৰিভাষা গাঁৱৰ শ্বাহাদত আলীৰ পত্নী চন্দ্রভানু নেচা বুলি জানিব পৰা গৈছে । স্থানীয় লোকে জনোৱা অনুসৰি মহিলাগৰাকীৰ বয়স ৬৫ বছৰ ।
জানিব পৰা মতে, দুপৰীয়াৰ ভাগত মহিলাগৰাকীয়ে প্ৰতিকূল বতৰকো নেওচি নিজ স্বামীৰ সৈতে ভোটগ্ৰহণ কেন্দ্ৰত ভোটাধিকাৰ সাব্যস্ত কৰিবলৈ আহিছিল । নিজৰ ভোটাধিকাৰ সাব্যস্ত কৰাৰ পিছতে ভোটকেন্দ্ৰৰ ভিতৰত অচেতন হৈ ঢলি পৰে চন্দ্ৰভানু । লগে লগে ভোটগ্ৰহণ কেন্দ্ৰত থকা স্বাস্থ্যকৰ্মীয়ে প্ৰাথমিক চিকিৎসা প্ৰদান কৰি অচেতন অৱস্থাতে নিজ স্বামীয়ে ঘৰলৈ লৈ যায় ।
পিছে ঘৰ পোৱাৰ আগতেই মহিলাগৰাকীৰ দেহাৱসান হয় । মৃত্যুৰ খবৰ পোৱাৰ মাত্ৰকে পৰিয়ালটোৰ মাজত এক শোকাকুল পৰিৱেশৰ সৃষ্টি হয় । পিছত এক শোকাকুল পৰিৱেশ মাজত মহিলাগৰাকীৰ জানাজাৰ নামাজ সম্পূর্ণ হয় । উক্ত ঘটনাক কেন্দ্ৰ কৰি সমগ্ৰ অঞ্চলজুৰি গভীৰ শোকৰ ছাঁ পৰা পৰিলক্ষিত হৈছে ।
