তেজপুৰ, ২৯ মাৰ্চ : লোকসভা নিৰ্বাচনৰ বাবে সাজু হৈছে সাধাৰণ ৰাইজৰ লগতে নৱ প্ৰজন্মৰ ভোটাৰ ৷ যুৱ প্ৰজন্মৰ ভোটাৰৰ লগতে প্ৰথমবাৰৰ ভোটাৰসকলৰ মনৰ কথাৰে ই টিভি ভাৰতৰ বিশেষ প্ৰতিবেদন নৱ প্ৰজন্মৰ ভোটাৰৰ মনৰ কথা ।
১১ নং শোণিতপুৰ লোকসভা সমষ্টিত অহা ১৯ এপ্ৰিলত হ’বলগীয়া নিৰ্বাচনত ভোটাধিকাৰ সাব্যস্ত কৰাৰ বাবে যুৱ প্ৰজন্মৰ আৰু প্ৰথমবাৰৰ ভোটাৰে একপ্ৰকাৰ নিশ্চিত কৰিছে কেনে হ’ব লাগে তেওঁলোকৰ প্ৰাৰ্থী ৷ শোণিতপুৰ লোকসভা সমষ্টিৰ অন্তৰ্গত তেজপুৰৰ নৱ প্ৰজন্মৰ ভোটাৰে বিচাৰে যাতে দিল্লীৰ সংসদত গৈ সাংসদগৰাকীয়ে বজ্ৰকণ্ঠৰে অসমৰ তথা শোণিতপুৰৰ সমস্যাসমূহ কেন্দ্ৰীয় চৰকাৰৰ দৃষ্টিগোচৰ কৰাব পাৰে ।
সংসদত গৈ টোপনিয়াই থকা সাংসদ নালাগে বুলি মন্তব্য কৰিছে তেজপুৰ চহৰৰ নৱ প্ৰজন্মৰ ভোটাৰে । এইসকল ছাত্ৰ-ছাত্ৰীয়ে শিক্ষাৰ ক্ষেত্ৰত চৰকাৰে গুৰুত্বপূৰ্ণ ভূমিকা গ্ৰহণ কৰাটো বিচাৰে ৷ নিবনুৱা সমস্যাৰ সমাধান কৰাটো অৰ্থাৎ উচ্চশিক্ষা গ্ৰহণ কৰি ঘৰতে বহি থকা হ’ব নালাগে বুলি মন্তব্য কৰে নতুন ভোটাৰসকলে ।
চৰকাৰী চাকৰিৰ সমান্তৰালভাৱে যুৱক-যুৱতীসকল যাতে ব্যৱসায়ৰ ক্ষেত্ৰতো আগবাঢ়ি গৈ নিজকে প্ৰতিষ্ঠা কৰিবলৈ সক্ষম হয় তাৰ বাবে চৰকাৰে সিদ্ধান্ত লোৱাৰ প্ৰয়োজন আছে বুলি কয় নতুন প্ৰজন্মই । তেজপুৰ লোকসভা সমষ্টি(বৰ্তমান শোণিতপুৰ)ৰ বৰ্তমানৰ সাংসদগৰাকীয়ে সমষ্টিৰ উন্নয়নত ব্যৰ্থ হোৱা বুলি মন্তব্য কৰিছে নতুন প্ৰজন্মই ।
আনহাতে তেজপুৰখন শিক্ষাৰ ক্ষেত্ৰত বহু পিচপৰি থকা বুলি উল্লেখ কৰি চৰকাৰী বিদ্যালয়সমূহ বন্ধ কৰাতকৈ উন্নতমানৰ শিক্ষা প্ৰদানৰ ব্যৱস্থা গ্ৰহণ কৰাৰ বাবে আহ্বান জনাই নতুন প্ৰজন্মৰ ভোটাৰসকলে ।
তদুপৰি হিতধিকাৰী সৃষ্টিৰ বিৰুদ্ধেও মাত মাতিছে নতুন প্ৰজন্মই ৷ তেওঁলোকে কয় যে হিতাধিকাৰী সৃষ্টি দাৰিদ্ৰতাৰ সমাধান নহয়, তেওঁলোকক স্বাৱলম্বী কৰাটোতহে চৰকাৰে গুৰুত্ব দিব লাগিছিল বুলি গুৰুত্বপূৰ্ণ মন্তব্য কৰে নতুন প্ৰজন্মই ৷
