নিউজ ডেস্ক, ১৫ মে': দিল্লীৰ মুখ্যমন্ত্ৰীৰ বাসভৱনত ৰাজ্যসভাৰ সাংসদ স্বাতী মালিৱালৰ সৈতে হোৱা দুৰ্ব্যৱহাৰৰ ঘটনাক লৈ এতিয়া দিল্লীৰ ৰাজনীতি উত্তপ্ত হৈ পৰিছে । আনহাতে, বিজেপিয়ে এই বিষয়টোৰ প্ৰসংগ উত্থাপন কৰি আপক তীব্ৰ আক্ৰমণ কৰিছে । লগতে ভাৰতীয় জনতা পাৰ্টীয়ে এই বিষয়টোক ৰাজনৈতিক লাভালাভৰ মূলধন কৰিবলৈ উঠি-পৰি লাগিছে ।
ইয়াৰে অংশ হিচাপে বিজেপি মহিলা কৰ্মীসকলে মুখ্যমন্ত্ৰীৰ বাসগৃহৰ ওচৰত প্ৰতিবাদ সাব্যস্ত কৰে । তেওঁলোকে মুখ্যমন্ত্ৰী কেজৰিৱালৰ বিৰুদ্ধে তীব্ৰ শ্লোগান দিয়ে আৰু লগতে মুখ্যমন্ত্ৰী অৰবিন্দ কেজৰিৱালে তেওঁৰ পদৰ পৰা পদত্যাগ কৰা উচিত বুলি দাবী কৰে ।
উল্লেখ্য যে স্বাতী মালিৱালে অভিযোগ কৰিছিল যে তেওঁক মুখ্যমন্ত্ৰীৰ বাসগৃহত প্ৰহাৰ কৰা হৈছিল । মঙলবাৰে আপৰ জ্যেষ্ঠ নেতা তথা ৰাজ্যসভাৰ সাংসদ সঞ্জয় সিঙেও বিষয়টো সন্দৰ্ভত এক বিবৃতি প্ৰদান কৰে । তেওঁ কয় যে এই বিষয়ত শীঘ্ৰেই ব্যৱস্থা গ্ৰহণ কৰা হ'ব ।
ইয়াৰ পূৰ্বে এই বিষয়ত স্বাতী মালিৱালৰ প্ৰাক্তন স্বামী নবীন জয়হিন্দে মুখ্যমন্ত্ৰী কেজৰিৱালক আক্ৰমণ কৰিবলৈ চেষ্টা কৰে । তেওঁ কয় যে সঞ্জয় সিঙে অৰবিন্দ কেজৰিৱালৰ শ্ৰুতলিপি মতে কাম কৰি আছে ।
নবীন জয়হিন্দে কয়, "স্বাতী মালিৱালক ভাবুকি দিয়া হৈছে, তেওঁক ভয় দেখুওৱা হৈছে । অন্যথা কোনেও আৰক্ষীক এনেদৰে ফোন নকৰে বা আৰক্ষী থানাৰ পৰা উভতি নাহে আৰু এনচিডব্লিউয়ে এই বিষয়ত ব্যৱস্থা লোৱা উচিত । স্বাতী আগবাঢ়ি আহিব লাগে, তেওঁক নীৰৱ কৰি ৰাখিব নোৱাৰি । মই নাজানো তেওঁৰ ওপৰত কি হেঁচা দিয়া হৈছে । দিল্লী আৰক্ষীয়ে বিষয়টো বিবেচনা কৰা উচিত ।"
