జాతీయ సైనిక దినోత్సవం, యూపీ మాజీ సీఎం మాయావతి పుట్టినరోజు సందర్భంగా ఫిట్ ఇండియా ఫౌండేషన్ ఆధ్వర్యంలో.. యాదాద్రి భువనగిరి జిల్లా కేంద్రంలోని ప్రభుత్వ జూనియర్ కళాశాలలో 5కె రన్ కార్యక్రమం నిర్వహించారు. ఈ కార్యక్రమాన్ని ఫిట్ ఇండియా ఫౌండేషన్ రాష్ట్ర కార్యవర్గ సభ్యుడు రుద్రవరం అనిల్ స్వేరో, జిల్లా సలహాదారుడు బొల్లెడ్ల నరేష్ స్వేరో ప్రారంభించారు.
ఆరోగ్యమే మహాభాగ్యం
మనం ఎక్కడ ఉన్నా ప్రతి ఒక్కరూ ఆరోగ్యం గురించి ఆలోచిస్తూ వ్యాయామం చేయాలని అనిల్ పేర్కొన్నారు. భగవంతుడిని మొక్కితే వందేళ్లు బతుకుతామో లేదో తెలియదు కానీ.. ఫిట్ ఇండియాతో మాత్రం ఆరోగ్యంగా జీవించగలమని ధీమా వ్యక్తం చేశారు. ఆరోగ్య భారత్ లక్ష్యంగా సమాజాన్ని ముందుకు తీసుకెళ్లడానికి ఫౌండేషన్ కృషి చేస్తోందని జిల్లా ప్రధాన కార్యదర్శి ముత్యాల రమేష్ పేర్కొన్నారు. ప్రతి ఒక్కరూ వ్యాయామం చేస్తూ ఆరోగ్యంగా ఉండాలని జిల్లా ఉపాధ్యక్షుడు తలారి గణేష్ సూచించారు. మనతో పాటు ఇతరులు కూడా ఆరోగ్యంగా ఉండేలా వారిని ప్రోత్సహించాలని తెలిపారు. మతం, ప్రాంతం, వర్గ భేదాలతో సంబంధం లేకుండా ఫిట్ ఇండియా ఫౌండేషన్ కృషి చేస్తోందని వెల్లడించారు.