KCR about Ambedkar Jayanti : 'అంబేడ్కర్​ రచనలు ప్రపంచాన్నే ఆలోచింపజేశాయి'

CM KCR on Ambedkar Jayanti: భారత రాజ్యాంగ నిర్మాతగా, దేశ గమనాన్ని మార్చడంలో డాక్టర్ బాబాసాహెబ్ అంబేడ్కర్ పోషించిన పాత్ర ఎనలేనిదని ముఖ్యమంత్రి కేసీఆర్ అన్నారు. అంబేడ్కర్ జయంతి సందర్భంగా జాతికి ఆయన అందించిన సేవలను స్మరించుకున్నారు. ప్రపంచంలోనే మరెక్కడా లేని విధంగా హైదరాబాద్ నడిబొడ్డున 125 అడుగుల అంబేడ్కర్ మహా విగ్రహాన్ని ప్రతిష్టించి.. తెలంగాణ బాంధవునికి రాష్ట్ర ప్రజలు, ప్రభుత్వం తరఫున ఘన నివాళి అర్పిస్తున్నామని తెలిపారు.

CM KCR on Ambedkar Jayanti: రాష్ట్రంలోని సబ్బండ కులాలు, మహిళలు, పేద వర్గాలు, అందరికీ అన్ని రకాలుగా ఆసరాను అందిస్తూ అంబేడ్కర్ ఆశయాలను రాష్ట్ర ప్రభుత్వం కొనసాగిస్తోందని సీఎం కేసీఆర్ తెలిపారు. తెలంగాణ స్ఫూర్తితో దేశంలో దళిత సకల జనుల సంక్షేమానికి తమ కృషి కొనసాగుతూనే ఉంటుందని పునరుద్ఘాటించారు. డాక్టర్ బాబా సాహెబ్ అంబేడ్కర్ 132వ జయంతి సందర్భంగా సీఎం కేసీఆర్ ఆయనను గుర్తు చేసుకున్నారు. భారత రాజ్యాంగ నిర్మాతగా, దేశ గమనాన్ని మార్చడంలో ఆయన పోషించిన పాత్రను, జాతికి అందించిన సేవలను గుర్తు చేసుకున్నారు.

అంబేడ్కర్​ జీవితమే ఆదర్శం: కష్టంతో కూడుకున్న ఎంతటి సుధీర్ఘమైన ప్రయాణమైనా చిత్తశుద్ధితో, పట్టుదలతో కొనసాగిస్తే కచ్చితంగా గమ్యాన్ని చేరుకుంటామని కేసీఆర్ తెలిపారు. ఈ క్రమంలో ఎదురయ్యే అడ్డంకులను ఆత్మవిశ్వాసంతో ఎదుర్కోవాలనే తాత్వికతకు అంబేడ్కర్ జీవితమే నిదర్శనమని పేర్కొన్నారు. వర్ణం, కులం పేరుతో వివక్ష, అంటరానితనాన్ని చిన్నతనం నుంచే ఎదుర్కొన్నా.. ఏనాడూ వెనకడుగు వేయని ధీరోదాత్తుడు అంబేడ్కర్ అని వెల్లడించారు.

ప్రపంచాన్ని ఆలోచింపజేసిన అంబేడ్కర్​ ప్రసంగాలు: సమాజంలో నెలకొన్న అజ్జానం, అంధకారాలను చీల్చుకుంటూ జ్ఞానపు వెలుగులు విరజిమ్మిన ప్రపంచ మేధావి అంబేడ్కర్ అని సీఎం కేసీఆర్ కొనియాడారు. ప్రజాస్వామ్యం, వర్ణ నిర్మూలన, అంటరానితనం, మత మార్పిడులు, స్త్రీల హక్కులు, మతం, ఆర్థిక సంస్కరణలు, చరిత్ర, ఆర్థిక వ్యవస్థతో పాటు అనేక అంశాలపై ఆయన చేసిన రచనలు, ప్రసంగాలు, విమర్శలు యావత్ ప్రపంచాన్ని ఆలోచింపజేశాయని అన్నారు. అసమానతలు లేని ఆధునిక భారతదేశాన్ని ఆవిష్కరించేందుకు, సమస్త వ్యవస్థల్లో సమాన హక్కుల కోసం జీవితకాలం పరితపించిన ఆదర్శమూర్తి అంబేడ్కర్ అన్నారు.

Tamilisai on Ambedkar : అంబేడ్కర్ జయంతిని పురస్కరించుకుని గవర్నర్ తమిళి సై సౌందరరాజన్ ఆ మహనీయుడి సేవలను స్మరించుకున్నారు. రాజ్యాంగ నిర్మాత బీఆర్ అంబేడ్కర్ జయంతి సందర్భంగా ఆయనకు నివాళులు అర్పించారు. అంబేడ్కర్ గొప్ప సంఘ సంస్కర్త, మంచి న్యాయవాది అని పేర్కొన్నారు. రాజ్యాంగాన్ని రూపొందించి అంబేడ్కర్ భరత మాత ముద్దుబిడ్డగా నిలిచారని తెలిపారు.

KTR tweet on Ambedkar : అంబేడ్కర్ జయంతి సందర్భంగా మంత్రి కేటీఆర్ ట్విటర్​ వేదికగా ఆయనను స్మరించుకున్నారు. స్వేచ్ఛ, సమానత్వం, సౌభ్రాతృత్వాన్ని బోధించే మతం అంటే తనకు ఇష్టమని పేర్కొన్నారు. ప్రపంచంలోనే అతి పెద్ద అంబేడ్కర్ విగ్రహాన్ని సీఎం కేసీఆర్ ఆవిష్కరించడంపై హర్షం వ్యక్తం చేశారు. దీనికి సంబంధించిన వీడియోను పోస్ట్​ చేశారు.

ఇవీ చదవండి: