టోక్యో పారాలింపిక్స్ బ్యాడ్మింటన్లో రజతం గెలిచి భారత్కు మరో పతకం సాధించిపెట్టారు యతిరాజ్ సుహాస్. టోర్నీలో తన చారిత్రక ప్రస్థానాన్ని విజయవంతంగా ముగించారు. పారాలింపిక్స్లో పతకం గెలిచిన తొలి కలెక్టర్గానూ సరికొత్త రికార్డు సృష్టించారు.
యతిరాజ్ రజతం గెలిచి అరుదైన ఘనత సాధించారు. పారాలింపిక్స్ చరిత్రలోనే పతకం గెలిచిన తొలి ఐఏఎస్ అధికారిగా అవతరించారు.
- ఉత్తర్ప్రదేశ్లోని గౌతమ్ బుద్ధ నగర్ కలెక్టర్గా విధులు నిర్వహిస్తూనే కఠోరంగా శ్రమించి పారాలింపిక్స్లో సరికొత్త చరిత్ర సృష్టించారు. కంప్యూటర్ ఇంజినీర్ అయిన యతిరాజ్.. ఐఏఎస్ కావాలనే లక్ష్యాన్ని నెరవేర్చుకున్నారు. గతేడాది నోయిడాలో అతనికి పోస్టింగ్ ఇచ్చారు. కరోనా క్లిష్ట సమయంలో చక్కగా విధులు నిర్వర్తించారు.
- భారత్ కోసం పతకం సాధించడం గర్వంగా ఉందని, కానీ స్వర్ణం గెలవలేకపోయినందుకు కాస్త నిరాశగా ఉందని మ్యాచ్ అనంతరం యతిరాజ్ చెప్పారు. తొలి సెట్ గెలిచాక రెండో సెట్లోనే మ్యాచ్ ముగిస్తే బాగుండేదని అన్నారు.
- యతిరాజ్ సతీమణి రితు సుహాస్ కూడా ఐఏఎస్ అధికారే కావడం మరో విశేషం. గజియాబాద్ అదనపు కలెక్టర్గా ఆమె విధులు నిర్వర్తిస్తున్నారు. భర్త విజయం పట్ల ఎంతో గర్వంగా ఉందని ఉప్పొంగిపోయారు. పారాలింపిక్స్లో భారత్ తరఫున ఆడాలనేది ఆయన కల అని.. ఆరేళ్ల శ్రమకు అద్భుత ఫలితం దక్కిందని ఆనందం వ్యక్తం చేశారు. భారత్కు పతకం- కలెక్టర్ల ఇంట్లో సంబరాలు
- ఈ విజయంతో ఇద్దరి కలెక్టర్ల కుటుంబాలు సంబరాల్లో మునిగిపోయాయి. కుటుంబ సభ్యులు మిఠాయిల పంచి, డ్యాన్స్ చేసి సంతోషంలో మునిగిపోయారు.
- పారాలింపిక్స్లో భారత్కు రజతం సాధించి పెట్టినందుకు యతిరాజ్కు ఫోన్ చేసి అభినందలు తెలిపారు ప్రధాని నరేంద్ర మోదీ. ఈ సందర్భంగా ఆటగాళ్లు ఫలితాల గురించి కాకుండా ఆట మీదే పూర్తిగా దృష్టి సారించాలని టోర్నీకి ముందు మోదీ చెప్పిన మాటలను యతిరాజ్ ప్రస్తావించారు.
- యతిరాజ్కు రాష్ట్రపతి రామ్నాథ్ కోవింద్ కూడా ట్విట్టర్ వేదికగా అభినందనలు తెలిపారు. ఈ విజయం పట్ల దేశం గర్విస్తోందని కొనియాడారు.