BCCI Bought Neeraj Chopra Javelin : ఒలింపిక్స్ సంగ్రామాన భారత అథ్లెటిక్స్‌లో చరిత్ర సృష్టించిన జావెలిన్ అది.. భారత క్రీడాకారుడు నీరజ్ చోప్రా చేతుల్లో నుంచి రివ్వున దూసుకుపోయి తొలిసారి స్వర్ణ పతకం ముద్దాడేలా చేసిన బల్లెం అది.. అలాంటి జావెలిన్‌ను ప్రధాని నరేంద్ర మోదీకి బహుమతిగా నీరజ్ చోప్రా ఇచ్చాడు. మోదీ సేకరించిన మెమెంటోలను గతేడాది ఈ-ఆక్షన్‌లో పెట్టగా.. జావెలిన్‌కు రూ.1.5 కోట్లకు బిడ్ వచ్చింది. భారీ మొత్తంతో దక్కించుకున్నదెవరని అప్పట్లోనే చర్చ సాగింది. తాజాగా ఆ వివరాలు బయటకొచ్చాయి. ఆ జావెలిన్‌ను భారత క్రికెట్‌ కంట్రోల్‌ బోర్డు (బీసీసీఐ) సొంతం చేసుకున్నట్లు తెలిసింది. ఈ-వేలం ద్వారా వచ్చే సొమ్మును 'నమామీ గంగే' కార్యక్రమం కోసం వెచ్చించనున్నారు. గతేడాది సెప్టెంబర్‌-అక్టోబర్‌ మధ్య ఈ-వేలం జరిగింది.
''టోక్యో ఒలింపిక్స్‌లో బంగారు పతకం సాధించిన నీరజ్ చోప్రా జావెలిన్‌ను బీసీసీఐ బిడ్‌లో దక్కించుకుంది. జావెలిన్‌తోపాటు ఇతర కలెక్షన్ల కోసం బిడ్ దాఖలు చేశాం. నమామీ గంగే వంటి మంచి కార్యక్రమానికి చేదోడుగా ఉండటం గర్వంగా ఉందని ఆఫీస్‌ బేరర్స్‌ భావిస్తున్నారు. దేశం పట్ల ఇది మా బాధ్యత'' అని బీసీసీఐ సీనియర్‌ అధికారి ఒకరు వెల్లడించారు. నీరజ్ చోప్రా జావెలిన్‌తోపాటు పారా ఒలింపిక్‌ ఆటగాడు సంతకం చేసిన వస్త్రం (రూ. కోటి), ఫెన్సర్‌ భవానీ దేవి ఖడ్గం (రూ.1.25 కోట్లు), పారా ఒలింపిక్‌ జావెలిన్ త్రోయర్‌ సుమిత్ అంటిల్‌ జావెలిన్ (రూ. 1.002 కోట్లు)ను కూడా బీసీసీఐ దక్కించుకుంది. కొవిడ్‌ మొదటి దశలో పీఎంకేర్‌కు బీసీసీఐ రూ. 51 కోట్లను విరాళంగా ఇచ్చింది.