కృతిశెట్టితో(Krithi Shetty movies) తాను సినిమా చేయలేనని ప్రముఖ నటుడు విజయ్ సేతుపతి (Vijay Sethupathi movies)అన్నారు. కృతిశెట్టి-వైష్ణవ్‌ తేజ్‌ జంటగా నటించిన 'ఉప్పెన' చిత్రంలో విజయ్ సేతుపతి ఆమె తండ్రి పాత్రలో కనిపించారు. ఆ సినిమాలో విజయ్ నెగెటివ్‌ షేడ్స్‌ ఉన్న పాత్ర పోషించారు. కాగా, తాజాగా 'లాభం' సినిమా ప్రమోషన్స్‌లో భాగంగా ఓ ఛానల్‌కు ఇచ్చిన ఇంటర్వ్యూలో విజయ్ ఆసక్తికర విశేషాలు పంచుకున్నారు. తాను కథానాయకుడిగా చేయనున్న ఓ సినిమాలో కృతిశెట్టిని హీరోయిన్‌గా ఎంపిక చేశారని అన్నారు.
"ఉప్పెన'లో బేబమ్మ(కృతిశెట్టి) తండ్రి పాత్రలో నటించి తెలుగువారికి చేరువయ్యా. ఆ సినిమా విడుదలైన కొన్ని నెలల తర్వాత తమిళంలో ఓ ప్రాజెక్ట్‌ చేశా. అందులో కథానాయికగా కృతిశెట్టిని ఎంచుకుంటే బాగుంటుందని టీమ్‌ భావించి.. ఆమె ఫొటో నాకు పంపించారు. నేను వెంటనే వాళ్లకు ఫోన్ చేసి.. 'ఇటీవల ఓ సినిమాలో నేను ఆమెకు తండ్రిగా నటించా. కూతురు పాత్ర పోషించిన ఆమెతో రొమాన్స్ చేయలేను. కాబట్టి ఆమె వద్దు' అని చెప్పాను. 'ఉప్పెన' క్లైమాక్స్‌ షూట్‌ చేస్తున్నప్పుడు ఆమె కొంచెం కంగారు పడింది. దాంతో నేను.. 'బేబమ్మ.. నాకు నీ వయసు కొడుకే ఉన్నాడు. కాబట్టి నువ్వు కూడా నా కూతురు లాంటి దానివే. భయపడకు. ఎలాంటి కంగారు లేకుండా ధైర్యంగా చెయ్‌' అని ప్రోత్సహించా. కూతురిలా భావించిన ఆమెకు జోడీగా నటించడం నా వల్ల కాదు" అని విజయ్ సేతుపతి వివరించారు.