రష్యా అధ్యక్షుడు వ్లాదిమిర్ పుతిన్ ఆహ్వానం మేరకు.. మాస్కోకు చేరుకున్న చైనా అధ్యక్షుడు జిన్పింగ్కు ఘన స్వాగతం లభించింది. 3 రోజుల పర్యటన నిమిత్తం రష్యా వెళ్లిన జిన్పింగ్.. పుతిన్తో ద్వైపాక్షిక అంశాలపై చర్చించారు. కాగా, ఉక్రెయిన్ యూద్ధాన్ని శాంతి చర్చలతో ముగించాలని డ్రాగన్ గత కొంతకాలంగా యుద్ధ క్షేత్రంలో ఉన్న ఇరు దేశాలపై ఒత్తిడి తెస్తోంది. దీంతోపాటు ఇటీవల చైనా.. ఇరాన్, సౌదీ దేశాల మధ్య మధ్యవర్తిగా వ్యవహరించి.. ఇరు దేశాలు ఓ ఒప్పందానికి వచ్చేలా చేసింది. దీంతో ఇరాన్, సౌదీ బంధంలో మరో ముందడుగు పడింది. ఈ నేపథ్యంలో జిన్పింగ్.. పుతిన్తో జరిపిన చర్చలకు ప్రాధాన్యం ఏర్పడింది. కాగా, ఈ చర్చలు మంగళవారం కూడ కొనసాగుతాయని రష్యా ఉన్నతాధికారి ఒకరు తెలిపారు. ఆ తర్వాత ఇరు దేశాల ప్రతినిధులు చర్చల్లో పాల్గొంటారని వెల్లడించారు.
జిన్పింగ్ మాస్కో చేరుకున్నాక ఓ ప్రకటన విడుదల చేశారు. " ఏ విధమైన కూటమి లేకుండా, ఎలాంటి ఘర్షణ లేకుండా, మూడో పక్షాన్ని టార్గెట్ చేయకుండా.. మా రెండు దేశాలు ద్వైపాక్షిక సంబంధాన్ని ఏర్పర్చుకున్నాయి. దేశాల మధ్య సంబంధాలు మెరుగు పడేందుకు కొత్త మోడల్ను అభివృద్ధి చేయడంలో ఉదాహరణగా నిలిచాయి. ఐరాస చార్టర్ ప్రయోజనాలు, సూత్రాల ఆధారంగా అంతర్జాతీయ సంబంధాల ప్రాథమిక నిబంధనలను ద్వారా అంతర్జాతీయ క్రమాన్ని పరిరక్షించడంలో రష్యాతో కలిసి మేము పనిచేస్తాము." అని చెప్పారు.