Japan Population Crisis : జపాన్​లో భారీగా తగ్గిన జనాభా.. విదేశీయుల సంఖ్యలో వృద్ధి

Japan Population Decline : జపాన్​లో జనాభా రికార్డు స్థాయిలో తగ్గింది. చరిత్రలో ఎన్నడూ లేని విధంగా.. ఆ దేశంలోని 47 జిల్లాల్లోనూ జనాభా క్షీణించింది. అయితే.. అక్కడే నివాసం ఉండే విదేశీయుల సంఖ్య మాత్రం పెరిగింది. ఈ ఏడాది జనవరి 1 నాటికి ఉన్న వివరాల ఆధారంగా జపాన్​ అంతర్గత వ్యవహారాలు, సమాచార మంత్రిత్వ శాఖ బుధవారం విడుదల చేసిన నివేదికలోని ముఖ్యాంశాలు ఇలా ఉన్నాయి..

1. 2023 జనవరి 1 నాటికి జపాన్​ మొత్తం జనాభా 12.54 కోట్లు. అంతకు ముందు ఏడాదితో పోల్చితే ఇది దాదాపు 5 లక్షలు తక్కువ.
2. జపాన్​లో ఆ దేశ పౌరుల సంఖ్య భారీగా తగ్గింది. మొత్తం జనాభాలో జపనీయుల సంఖ్య 12.24 కోట్లు. అంతకుముందు సంవత్సరంతో పోల్చితే ఇది 8లక్షలు, అంటే 0.65శాతం తక్కువ.
3. జపాన్​ పౌరుల జనాభాలో క్షీణత నమోదవడం ఇది వరుసగా 14వ ఏడాది.
4. జపాన్​లో నివాసం ఏర్పరుచుకున్న విదేశీయుల సంఖ్య మాత్రం గణనీయంగా పెరిగింది.
5. 2022లో జపాన్​లో నివాసం ఉంటున్న విదేయుల సంఖ్య 2021తో పోల్చితే 10.7శాతం వృద్ధి చెందింది. మొత్తం జనాభాలో వీరి వాటా 2.4శాతం.
6. జపాన్​లో విదేశీయుల జనాభా లెక్కలు సేకరించడాన్ని అక్కడి ప్రభుత్వం 2013లో ప్రారంభించింది. ఆ తర్వాత వారి సంఖ్య ఈ స్థాయిలో పెరగడం ఇదే తొలిసారి.
7. 2008లో జపాన్ జనాభా గరిష్ఠ స్థాయిని తాకింది. ఆ తర్వాత నుంచి ఆ దేశ జనాభా గణనీయంగా తగ్గుతూ వస్తోంది. జననాల రేటులో క్షీణతే ఇందుకు ప్రధాన కారణం. 2022లో జపాన్​లో అత్యల్పంగా 7,71,801 జననాలు నమోదయ్యాయి.
8. జననాల రేటులో క్షీణతకు అడ్డుకట్ట వేయడాన్ని తన ప్రధాన లక్ష్యాల్లో ఒకటిగా నిర్దేశించుకున్నారు జపాన్ ప్రధాన మంత్రి ఫుమియో కిషిదా.
9. జనాభా వృద్ధి కోసం రానున్న మూడేళ్ల పాటు సంవత్సరానికి 3.5 ట్రిలియన్ యెన్​లు (25.2 బిలియన్ డాలర్లు) ఖర్చు చేస్తామని ప్రకటించారు జపాన్ ప్రధాని కిషిదా. శిశు జననం, పెంపకం; ఉన్నత విద్య అభ్యసించే వారికి మరిన్ని రాయితీలు వంటి ప్రోత్సాహాలతో కూడిన శిశు సంరక్షణ ప్యాకేజీ అమలుకు ఈ డబ్బును ఖర్చు చేస్తామని తెలిపారు.
10. స్థానిక జనాభా తగ్గుదల నేపథ్యంలో విదేశీయులను ఆకట్టుకునేలా విశ్వ ప్రయత్నాలు చేస్తోంది జపాన్ ప్రభుత్వం. శాశ్వత నివాస హక్కు కల్పించేలా వలస విధానంలో విప్లవాత్మక మార్పులు చేపడుతోంది.
11. విదేశీ ఉద్యోగులు మరిన్ని రంగాల్లో పని చేసేందుకు అవకాశం కల్పించాలన్న ప్రణాళికకు జపాన్ మంత్రివర్గం గత నెల ఆమోద ముద్ర వేసింది.
12. అయితే.. జనాభా క్షీణతకు అడ్డుకట్ట వేసేందుకు జపాన్ ప్రభుత్వం తీసుకుంటున్న చర్యలపై నిపుణులు అసంతృప్తి వ్యక్తం చేస్తున్నారు. ఇవి.. అసలు సమస్యను పరిష్కరించేలా లేవని అభిప్రాయపడుతున్నారు.
13. విదేశీయుల్ని ఆకట్టుకునేందుకు మరిన్ని చర్యలు చేపట్టాల్సి ఉందన్నది నిపుణుల మాట. వేతనాల పెంపు, పని ప్రదేశంలో మరింత మెరుగైన వసతులు, మైనారిటీలనూ కలుపుకుని వెళ్లేలా సమాజంలో మార్పు తీసుకురావడం తప్పనిసరి అనేది వారి వాదన.

• ఇవీ చదవండి: