కాబుల్ మిలటరీ ఆసుపత్రిపై జరిగిన బాంబుల దాడిలో (Afghan blast news) మరణించిన వారి సంఖ్య 20కి పెరిగింది. మరో 16 మంది తీవ్రంగా గాయపడి ఆస్పత్రిలో చికిత్స పొందుతున్నారని అధికారులు తెలిపారు. 400 పడకల సర్దార్ దావూద్ ఖాన్ ఆసుపత్రిపై ముష్కరులు మంగళవారం దాడి చేశారు. ఈ దాడి తామే చేశామని ఇస్లామిక్ స్టేట్ అనుబంధ సంస్థ ఇస్లామిక్ స్టేట్ ఖొరాసన్‌ (ఐఎస్కే) ప్రకటించింది.
ఐఎస్కే ఉగ్రవాదులు ఆసుపత్రి గేటు దగ్గర బాంబు పేల్చిన (Afghan blast update) తరువాత లోపలికి ప్రవేశించారని ప్రత్యక్ష సాక్షులు తెలిపారు. తాలిబన్లు జరిపిన ఎదురు కాల్పుల్లో నలుగురు ఐఎస్కే ఉగ్రవాదులు హతమవ్వగా.. ఒకరిని సజీవంగా పట్టుకున్నామని అధికారులు పేర్కొన్నారు. హెలికాప్టర్ ద్వారా ఆసుపత్రి ప్రాంగణంలో దిగిన తాలిబన్ ప్రత్యేక బలగాలు దుండగులను లోనికి ప్రవేశించకుండా నిరోధించాయని వెల్లడించారు. దుండగులంతా 15 నిమిషాల్లో హతమయ్యారని తాలిబన్ ప్రతినిధి జబీహుల్లా ముజాహిద్ వెల్లడించారు. అఫ్గాన్ ప్రభుత్వం నుంచి స్వాధీనం చేసుకున్న ఎయిర్‌క్రాఫ్ట్‌ను తాలిబన్లు ఉపయోగించడం ఇదే మొదటిసారని ఆయన తెలిపారు.