Bimbisara Prerelease Event: ''చిత్ర పరిశ్రమకి గడ్డుకాలం అని.. థియేటర్‌కి ప్రేక్షకులు రావడం లేదనీ అంటున్నారు. ఇదంతా నేను నమ్మను. అద్భుతమైన చిత్రం వస్తే చూసి ఆశీర్వదించే గొప్ప హృదయం తెలుగు ప్రేక్షకులది. రానున్న 'బింబిసార'తోపాటు మరో చిత్రం 'సీతారామం'ని ఆదరించి తెలుగు చిత్ర పరిశ్రమకి కొత్త ఊపిరి పోయాలని కోరుకుంటున్నా'' అన్నారు ప్రముఖ కథానాయకుడు ఎన్టీఆర్. ఆయన సోదరుడు నందమూరి కల్యాణ్రామ్ కథానాయకుడిగా నటించిన చిత్రం 'బింబిసార'. కేథరిన్‌, సంయుక్త మేనన్‌ కథానాయికలు. వశిష్ఠ్‌ దర్శకత్వం వహించారు. ఎన్టీఆర్ ఆర్ట్స్‌ పతాకంపై హరికృష్ణ.కె నిర్మిస్తున్నారు. ఈ చిత్రం ఆగస్టు 5న ప్రేక్షకుల ముందుకొస్తోంది. ఈ సందర్భంగా శుక్రవారం హైదరాబాద్‌లో విడుదలకి ముందస్తు వేడుక జరిగింది. ఈ వేడుకకి ఎన్టీఆర్ ముఖ్య అతిథిగా హాజరయ్యారు.
''రెండున్నరేళ్ల కిందట ఒక రోజు కల్యాణ్ అన్న ఫోన్‌ చేసి 'నాన్నా ఒక ఆసక్తికరమైన కథ విన్నాను, ఒక్కసారి నువ్వు వింటే బాగుంటుంది' అని చెప్పారు. అంతకుముందే వశిష్ఠ్‌ నాకు తెలుసు. కొత్తగా వచ్చాడు, అనుభవం లేదు, ఇంత పెద్ద చిత్రాన్ని హ్యాండిల్‌ చేయగలడా అనే భయం ఉండేది. కానీ ఆ రోజు ఎంత కసితో చెప్పాడో, అంతకంటే గొప్పగా ఈ చిత్రాన్ని మలిచాడు. ఈ కథలో ఏం జరగబోతోందో తెలుసు నాకు. అంత తెలిసినా ఈ సినిమా చూసినప్పుడు ఎంతో ఆసక్తి కలిగింది. ప్రతి ప్రేక్షకుడూ అంతే ఆసక్తిగా ఈ సినిమాని చూస్తాడు. 'బింబిసార' చూస్తున్నప్పుడు కొత్త ఛోటా కె.నాయుడు కనిపించారు. ఈ సినిమాకి అన్నీ ఉన్నా ఇంకా ఎక్కడో ఒక చిన్న వెలితి ఉన్నట్టుగా అనిపించేది. ఆ వెలితిని ఎం.ఎం.కీరవాణి తీర్చారు.
'బింబిసార' విషయంలో ఇప్పుడు మాకు భయం లేదు, ఎప్పుడెప్పుడు విడుదలవుతుందా అనే ఆత్రుత తప్ప! ఈ రోజు అద్భుతమైన చిత్రాలు వస్తే తప్ప ప్రేక్షకులు సంతృప్తి చెందడం లేదు. ఇంత అద్భుతంగా సినిమా రావడం వెనక సాంకేతిక నిపుణులు, నటులే కారణం. ప్రేక్షకులకు నచ్చేవరకు చిత్రాలు చేస్తూనే ఉంటామని ఇదివరకు చెప్పాను. అభిమానులు కాలర్‌ ఎగరేసుకునేలా చేయడమే మా బాధ్యత అని చెప్పాం. 'బింబిసార' విడుదలయ్యాక నందమూరి కల్యాణ్రామ్ కాలర్‌ పైకి ఎత్తుతారు. ఈ సినిమాకి ముందు, తర్వాత అన్నట్టుగా ఉంటుంది ఆయన కెరీర్‌. 'బింబిసార' కోసం తన రక్తాన్ని ధారపోశారు. ఒక నటుడిగా తనని తాను మలుచుకున్నారు. కల్యాణ్రామ్ కాకపోతే మరెవ్వరూ ఆ పాత్రకి న్యాయం చేయలేర''న్నారు ఎన్టీఆర్. అభిమానుల్ని ఉద్దేశించి ఎన్టీఆర్ మాట్లాడుతూ 'నాకూ, మా కల్యాణ్ అన్నకీ.. మా తాతగారు, మా నాన్నగారు వదిలి వెళ్లిపోయిన అభిమానులు మీరు. ఎప్పటికీ రుణపడే ఉంటాం. జీవితాంతం ఆనందంగా ఉండేలా నడుచుకుంటాం. వర్షాల్లో కంగారుపడకుండాజాగ్రత్తగా ఇళ్లకు చేరండని'' కోరారు.