అదానీ గ్రూప్ కంపెనీలపై అమెరికా సంస్థ హిండెన్బర్గ్ రీసెర్చ్‌ ఆరోపణల కారణంగా గౌతమ్‌ అదానీ సంస్థ ఎన్నడూ లేని స్థాయిలో కరిగిపోతూ వస్తోంది. నెల రోజుల క్రితం 120 బిలియన్ డాలర్ల సంపదతో ప్రపంచ కుబేరుల జాబితాలో మూడోస్థానంలో ఉన్న గౌతమ్‌ అదానీ ఇప్పుడు ఏకంగా 25వ స్థానానికి పడిపోయారు. అనేక ఏళ్ల తర్వాత గౌతమ్‌ అదానీ సంపద 50 బిలియన్ డాలర్ల దిగువకు చేరింది. నెల రోజుల వ్యవధిలోనే గౌతమ్‌ అదానీ 72 బిలియన్ డాలర్లను కోల్పోయారు. ప్రస్తుతం ఫోర్బ్స్‌ బిలియనీర్ల రియల్‌ టైం జాబితాలో 47.9 బిలియన్ డాలర్లతో గౌతమ్‌ అదానీ 25వ స్థానంలో ఉన్నారు.
హిండెన్బర్గ్ రీసెర్చ్‌ చేసిన ఆరోపణలను అదానీ గ్రూప్ తోసిపుచ్చినప్పటికీ పెట్టుబడిదారులు, ఆర్థిక సంస్థల్లో ఈ నివేదిక ఆందోళన రేకెత్తించింది. అప్పటి నుంచి అదానీ గ్రూప్ సంస్థల షేర్లు పతనమవుతూ వస్తున్నాయి. ఫలితంగా గౌతమ్‌ అదానీ వ్యక్తిగత సంపదపై అది ప్రభావం చూపింది. ఈ ఏడాది ఆరంభం నుంచి గౌతమ్‌ అదానీ సంపదలో ఏకంగా 72 బిలియన్ డాలర్లు కరిగిపోయాయి. బ్లూమ్‌బర్గ్‌ బిలియనీర్ల ఇండెక్స్‌లో టాప్‌-500 కుబేరుల జాబితాలో ఎక్కువ మొత్తంలో సంపద కోల్పోయిన వ్యక్తిగా గౌతమ్‌ అదానీ నిలిచారు. ప్రస్తుతం ఫోర్బ్స్‌ జాబితాలో 85.1 బిలియన్ డాలర్ల సంపదతో రిలయన్స్‌ అధినేత ముఖేష్‌ అంబానీ ఆసియాలోనే అత్యంత ధనవంతుడైన వ్యక్తిగా ఉన్నారు. ప్రపంచ కుబేరుల జాబితాలో ఆయనది 8వ స్థానం.