అమెజాన్‌, ఫ్యూచర్‌ గ్రూప్‌ వివాదానికి త్వరలోనే చెక్​!

అమెరికా ఈ-కామర్స్‌ దిగ్గజం అమెజాన్‌, కిశోర్‌ బియానీ నేతృత్వంలోని ఫ్యూచర్‌ గ్రూప్‌ మధ్య పెట్టుబడులకు (Amazon Future Retail) సంబంధించి గత కొన్ని నెలలుగా సాగుతున్న వివాదానికి తెరపడనుందా? అంటే అవుననే అంటున్నాయి పరిశ్రమ వర్గాలు. రిలయన్స్‌ ఇండస్ట్రీస్‌, ఫ్యూచర్‌ రిటైల్‌ మధ్య కుదిరిన రూ.24,713 కోట్ల ఒప్పందంపై (Amazon Future Retail) అమెజాన్‌ న్యాయపోరాటం చేస్తోంది. 2019 పెట్టుబడుల ఒప్పందాన్ని ఫ్యూచర్‌ గ్రూప్‌ ఉల్లంఘించిందనేది అమెజాన్​ సంస్థ ఆరోపణ.

అయితే అమెజాన్‌, ఫ్యూచర్‌ గ్రూప్‌ ప్రతినిధుల మధ్య (Amazon Future Retail) కొన్ని వారాల కిందట జరిగిన కీలక సమావేశంలో ఇరు వర్గాలు వివాదం ముగించడానికి మొగ్గుచూపినట్లు సంబంధిత వర్గాలు చెబుతున్నాయి. ఫ్యూచర్‌ గ్రూప్‌ ప్రమోటర్‌ కిశోర్‌ బియానీ సైతం ఈ సమావేశంలో పాల్గొన్నారు. విదేశీ మారక నిర్వహణ చట్టాన్ని (ఫెమా) ఉల్లంఘించినట్లు తమపై ఆరోపణలు చేస్తూ, కాంపిటీషన్‌ కమిషన్‌ ఆఫ్‌ ఇండియా (సీసీఐ) వద్ద దాఖలు చేసిన ఫిర్యాదును ఉపసంహరించుకోవాల్సిందిగా ఫ్యూచర్‌ గ్రూప్‌ను అమెజాన్‌ కోరినట్లు సంబంధిత వర్గాలు తెలిపాయి. కోర్టు బయట సెటిల్‌మెంట్‌కు అమెజాన్‌ ఈ రూపేణ సంకేతాలు ఇచ్చిందని చెబుతున్నారు.

ఫ్యూచర్‌ గ్రూప్‌, రిలయన్స్‌ రిటైల్‌ ఒప్పందాన్ని సవాల్‌ చేస్తున్న అమెజాన్‌, పోరాటాన్ని వీడేందుకు ప్రతిగా పరిహారంపై చర్చించినట్లు సమాచారం. ఈ అంశంపై ఫ్యూచర్‌ గ్రూప్‌ స్పందించలేదు. వివాదం ముగించడానికి పరిహారం కోరుతున్నట్లు వచ్చిన వార్తలు తప్పుదోవ పట్టించే విధంగా ఉన్నట్లు అమెజాన్‌ అధికార ప్రతినిధి పేర్కొన్నారు. ఇదే విషయాన్ని స్వతంత్ర డైరెక్టర్లకు లిఖితపూర్వకంగా తెలియజేసినట్లు వెల్లడించారు. ఫ్యూచర్‌ రిటైల్‌కు చర్చల ద్వారా పూర్తి మద్దతు అందిస్తామని తెలిపారు.

ఇదీ చూడండి :Paytm share price: 2 రోజుల్లోనే రూ. 50వేల కోట్ల సంపద ఆవిరి!