ఉత్తర్ప్రదేశ్ మేరఠ్ జిల్లాకు చెందిన ఓ విద్యార్థి పర్యావరణహితమైన ఆవిష్కరణ చేశాడు. దివ్యం అనే బాలుడు.. కూరగాయలు, గడ్డితో ఆర్గానిక్ కాగితాన్ని తయారుచేశాడు. ఎల్ ఇంటర్నేషనల్ స్కూల్లో ఎనిమిదో తరగతి చదువుతున్న దివ్యం.. అడవులను నరికివేయటం వల్ల పర్యావరణం కాలుష్యం అవుతోందనే భావనతో ఈ పేపర్ను తయారు చేశాడు. ఈ పేపర్ రాయటానికి మాత్రమే కాక గ్రీటింగ్ కార్డ్స్ నుంచి చార్ట్ పేపర్ తయారీ వరకు అనేక విధాలుగా ఉపయోగపడుతుందని చెబుతున్నాడు.
వంటింట్లోని వ్యర్థాలతో ఈ పేపర్ తయారుచేశాడు దివ్యం. ఈ పేపర్ రాసేందుకు మాత్రమేకాక హాండ్క్రాఫ్ట్స్ కోసం కూడా ఉపయోగపడుతుందని ఆ విద్యార్థి చెప్పాడు. తాను చేసిన ఈ ప్రయోగం విజయవంతం అయ్యిందని.. తర్వాతి ప్రయోగంగా.. నాచు, ఎండిన ఆకులు, పువ్వులు, ఆకులతో పేపర్ తయారు చేస్తానని చెబుతున్నాడు.
విద్యార్థికి సైన్స్ సబ్జెక్ట్ అంటే చాలా ఇష్టమట. కొత్త విషయాలను తెలుసుకోవడానికి చాలా ఆసక్తి చూపిస్తాడని దివ్యం సైన్స్ టీచర్ చెబుతున్నారు.