Masanamuthu Pro Kabaddi Player Tamil Nadu Rains :ఇటీవల తమిళనాడులో భారీ వర్షాలు బీభత్సం సృష్టించాయి. ఈ వానల ధాటికి వాగులు, వంకలు పొంగిపొర్లి లోతట్టు ప్రాంతాలు నీటమునిగాయి. ఈ వరదల్లో దక్షిణ తమిళనాడులో ప్రాంతంలోని పంట పొలాలు, రోడ్లు జలమయమయ్యాయి. ఇళ్లలోకి వరద నీరు చేరి ప్రజలు తీవ్ర ఇబ్బందులు పడ్డారు. అయితే వరదల వల్ల తన కుటుంబం తీవ్ర ఇబ్బందులు ఎదుర్కొందని తూత్తుకూడికి చెందిన ప్రొకబడ్డీ జట్టు తమిళ్ తలైవాస్ ఆటగాడు మసనముత్తు తెలిపాడు. తన కుటుంబం కష్టసమయాల్లో ఉన్నప్పుడు సహాయం చేయలేకపోయానని నిస్సహాయత వ్యక్తంచేశాడు.
అయితే ప్రస్తుతం తన కుటుంబ సభ్యులు సురక్షితంగానే ఉన్నారని ఓ శిబిరంలో ఆశ్రయం పొందుతున్నారని మసనముత్తుతెలిపాడు. కానీ వరదల వల్ల తన ఇల్లు పూర్తిగా మునిగిపోయిందని, వస్తువులను కోల్పోయామని చెప్పాడు. తన ఇంటితో పాటు వర్షాల్లో చాలా ఇళ్లు కూలిపోయాయని వెల్లడించాడు. వర్షం కారణంగా తన ప్రతిభను తన తల్లిదండ్రులు, గ్రామస్థులకు చూపించలేకపోయానని విచారం వ్యక్తం చేశాడు. 'నేను కబడ్డీ ఆడటం మా తల్లిదండ్రులు, గ్రామస్థులు చూడాలనుకున్నారు. కానీ వర్షం కారణంగా వారు నేను ఆడుతున్న మ్యాచ్‌ను చూడలేకపోయారు. దాని గురించి ఆలోచిస్తే చాలా బాధగా ఉంది' అని మసనముత్తు చెప్పాడు.
ప్రొ కబడ్డీ లీగ్ 10వ సీజన్లో భాగంగా చెన్నైలోని నెహ్రూ ఇండోర్ స్టేడియంలో శుక్రవారం తమిళ్ తలైవాస్, పట్నా పైరేట్స్ మధ్య మ్యాచ్ జరిగింది. ఈ మ్యాచ్లో పట్నా పైరేట్స్ గెలిచింది. కానీ మైదానం లోపల, బయట సవాళ్లను ఎదుర్కొని నిలబడ్డ మసనముత్తు అందరికీ ప్రేరణగా నిలిచాడు.