భార్య ఐదో పెళ్లి- మనస్తాపంతో నాలుగో భర్త ఆత్మహత్య, సూసైడ్​ వీడియో తీసి

Man Suicide For Wife 5th Marriage : మధ్యప్రదేశ్​లోని ఇందోర్​లో తన భార్య ఐదో వివాహం చేసుకుందని ఓ భర్త ఆత్మహత్యకు పాల్పడ్డాడు. వారం రోజులుగా గాయాలతో చికిత్స పొందుతూ శనివారం మృతి చెందాడు. ఇంతకీ ఏం జరిగిందంటే?

Man Suicide For Wife 5th Marriage : తన భార్య ఐదో వివాహం చేసుకుందన్న మనస్తాపంతో ఓ భర్త తనకు తాను నిప్పంటించుకుని ఆత్మహత్యకు పాల్పడ్డాడు. ఈ ఘటన మధ్యప్రదేశ్​లోని ఇందోర్​లో జరిగింది. వారం రోజుల క్రితం నిప్పంటించుకోగా ఆస్పత్రిలో చికిత్స పొందుతూ శనివారం మృతిచెందాడు. ఈ విషయాన్ని తెలుసుకున్న పోలీసులు ఘటనా స్థలానికి చేరుకుని కేసు నమోదు చేసుకుని దర్యాప్తు చేపట్టారు.

ఇంతకీ ఏం జరిగిందంటే ?
మధ్యప్రదేశ్​ ఇందోర్​కు చెందిన సునీల్​ లోహానీ అనే 35 ఏళ్ల వ్యక్తి 2018లో ఓ మహిళను వివాహం చేసుకున్నాడు. అతడు ఆమెకు నాలుగో భర్త. అయితే వారిద్దరి మధ్య మనస్పర్ధలు ఏర్పడటం వల్ల ఆమె గతేడాది అతడిని వదిలి తన తల్లిదండ్రుల వద్దకు వెళ్లిపోయింది. అక్కడే నివసిస్తున్న ఆమె మరో వ్యక్తిని ఐదో వివాహం చేసుకుంది. ఈ విషయం సునీల్​కు తెలియడం వల్ల తీవ్ర మనస్తాపానికి గురయ్యాడు. ఈ క్రమంలోనే గత వారం ఓ సూసైడ్​ వీడియోను రికార్డు చేసి మరీ సోషల్ మీడియాలో అప్​లోడ్​ చేశాడు. ఆ తర్వాత పెట్రోల్ పోసుకుని తనకు తాను నిప్పంటించుకుని ఆత్మహత్యకు పాల్పడ్డాడు. అయితే అప్పటికే స్థానికులు, కుటుంబ సభ్యులు అప్రమత్తమై అతడ్ని ఆస్పత్రికి తరలించారు. కాలిన గాయలతో వారం పాటు చికిత్స పొందిన సునీల్​, శనివారం మృతి చెందాడు.

సమాచారం అందుకున్న పోలీసులు ఘటనా స్థలానికి చేరుకుని కేసు నమోదు చేసుకున్నారు. సూసైడ్ వీడియోతో పాటు ఇంటి బయట రికార్డు అయిన సీసీటీవీ ఫుటేజ్​ను స్వాధీనం చేసుకుని దర్యాప్తు చేపట్టారు. అయితే విచారణలో సునీల్​పై ఆమె వరకట్న వేధింపుల విషయంలో పోలీసులకు ఫిర్యాదు చేసినట్లు తేలింది. ఈ క్రమంలోనే కోర్టు కేసుతో విసిగిపోయి, అతడు ఈ నిర్ణయం తీసుకున్నాడేమో అని పోలీసులు అనుమానిస్తున్నారు. ఆమె ఐదో సారి వివాహం చేసుకున్న విషయమే ఆత్మహత్యకు కారణమా? లేక మరో కారణమా అనే కోణంలో దర్యాప్తు చేస్తున్నట్లు కూడా పోలీసులు వెల్లడించారు.