Free Ram Tattoo On Hand : మహారాష్ట్ర నాగ్‌పుర్‌లోని ఓ యువకుడు శ్రీరాముడిపై భక్తిని వినూత్నరీతిలో చాటుకుంటున్నాడు. టాటూ ఆర్టిస్ట్‌గా పనిచేస్తున్న ఆ యువకుడు తన దగ్గరకు వచ్చే భక్తులకు ఉచితంగా రాముడి పచ్చబొట్లు వేస్తున్నాడు. వివిధ రూపాల్లోని రాముడి చిత్రాలను అందంగా చేతులు, ఛాతి, భుజాలపై డిజైన్‌ చేస్తున్నాడు. పచ్చబొట్లు పొడిపించుకునేందుకు స్థానికులు ఆ టాటూ షాప్‌నకు భారీగా తరలివస్తున్నారు. చాలా సమయం లైన్లలో నిల్చుని మరీ టాటూలు వేయించుకుంటున్నారు.
22 ఏళ్ల హృతిక్ రాజేంద్ర దారోడే వృత్తిరీత్యా టాటూ ఆర్టిస్ట్. అతడికి శ్రీరాముడంటే ఎనలేని భక్తి. ప్రతి ఏడాది శ్రీరామనవమికి ఏదో కార్యక్రమాన్ని చేపడుతూ ఉంటారు. ఈ క్రమంలోనే ప్రాణప్రతిష్ఠను పురస్కరించుకుని వినూత్నంగా టాటూలు వేయాలని అనుకున్నాడు. సుమారు 101 మందికి ఉచితంగా శ్రీరాముడి పచ్చబొట్లను వేయాలని తీర్మానించుకున్నాడు. ఆ తర్వాత మంచి స్పందన రావడం వల్ల ఈ సంఖ్యను 1,001కు పెంచాడు. ఇప్పటివరకు సుమారు 350 మందికి టాటూలను వేశాడు హృతిక్. రోజుకు సుమారు 60 మందికి టాటూలను వేస్తున్నానని, జనవరి 22 వరకు తన లక్ష్యాన్ని పూర్తి చేస్తానని ధీమా వ్యక్తం చేస్తున్నాడు. ఈ కార్యక్రమానికి తండ్రి రాజేంద్ర, సోదరి రోషిణి, ఇతర స్నేహితులు సైతం సాయం చేస్తున్నారు. ఒక్కో టాటూకు హృతిక్కు రూ.350 ఖర్చు అవుతుంది. వెయ్యి మందికి సుమారు రూ.మూడున్నర లక్షల ఖర్చు అవుతోంది. కానీ ఈ మొత్తాన్ని అతడి కుటుంబసభ్యులు భరించనున్నారు.
"ఎన్నో ఏళ్ల తర్వాత కోట్లాది మంది హిందువుల కల నెరవేరబోతుంది. అయోధ్యలో శ్రీరాముడు కొలువుదీరనున్నాడు. ఇది నాకు, కోట్లాది మంది హిందువులకు గొప్ప అనుభూతిని ఇస్తుంది. ఈ వేడుక నేపథ్యంలో నా కళ ద్వారా సేవ చేస్తున్నాను."
--హృతిక్ రాజేంద్ర దారోడే, టాటూ ఆర్టిస్ట్