doctor performed cpr on patient : సాధారణ వైద్య పరీక్షల కోసం ఆసుపత్రికి వచ్చిన ఓ వ్యక్తికి ఉన్నట్టుండి గుండెపోటు వచ్చింది. అయితే, క్షణం ఆలస్యం చేయని ఆ వైద్యుడు.. రోగి కూర్చున్న కుర్చీలోనే సీపీఆర్ చేసి ప్రాణాలు కాపాడాడు. ఇందుకు సంబంధించిన వీడియోలు నెట్టింట వైరల్‌గా మారడంతో ఆ వైద్యుడిపై ప్రశంసలు కురుస్తున్నాయి. మహారాష్ట్రలోని కొల్హాపూర్‌కు చెందిన అర్జున్‌ అద్నాయక్‌ కార్డియాలజీ నిపుణుడు. కాగా, గుండె సంబంధిత వ్యాధి ఉన్న ఓ రోగి అర్జున్‌ వద్దకు నిత్యం జనరల్‌ చెకప్ కోసం వస్తుండేవారు.
రెండ్రోజుల క్రితం రొటీన్‌ చెకప్ కోసం మరోసారి వైద్యుడి వద్దకు వచ్చారు. 12ఏళ్ల క్రితం అమర్చిన పేస్‌మేకర్‌ను ఈసారి భర్తీ చేయించుకోవాలనుకున్నారు. అయితే, క్యాబిన్‌లో వైద్యుడి ముందు సీట్లో కూర్చున్న ఆ రోగికి.. ఉన్నట్టుండి అప్పుడే గుండెపోటు వచ్చింది. ఫలితంగా ఎలాంటి చలనం లేకుండా కుర్చీలో కిందికి వాలిపోసాగాడు. పరిస్థితిని గమనించిన వైద్యుడు అర్జున్‌ ఒక్క క్షణం కూడా ఆలస్యం చేయకుండా.. వెంటనే లేచివచ్చి కుర్చీలో ఉన్న అతడికి అక్కడే సీపీఆర్ చేశాడు. కొద్ది సెకన్లలో ఆ రోగి మళ్లీ సాధారణ స్థితికి చేరుకున్నాడు. కాగా ఈ దృశ్యాలు అక్కడి సీసీ కెమెరాల్లో నిక్షిప్తమయ్యాయి.