చంద్రబాబుతో పవన్​ భేటీ - తాజా రాజకీయ పరిణామాలపై చర్చ

14:02 December 06

తాజా రాజకీయ పరిణామాలపై ఇరువురి మధ్య చర్చ

Janasena Pawan Meet TDP Chandrababu: టీడీపీ అధినేత చంద్రబాబును హైదరాబాద్​లోని ఆయన నివాసంలో జనసేన చీఫ్ పవన్ కల్యాణ్ కలిశారు. తాజా రాజకీయ పరిణామాలపై ఇరువురి మధ్య చర్చ జరిగినట్లు సమాచారం. తెలుగుదేశం-జనసేన పార్టీల పొత్తు ప్రక్రియను వేగవంతం చేయడంపైనే ఇరువురు నేతలు సమాలోచనలు జరిపినట్లు తెలుస్తోంది. నవంబర్‌ 4వ తేదీన ఇదే తరహాలో చంద్రబాబు-పవన్‌ నిర్వహించిన సమావేశంలో పలు కీలక నిర్ణయాలు తీసుకున్నారు.

జిల్లా, నియోజకవర్గాల స్థాయిల్లో ఇరుపార్టీలూ సమన్వయ కమిటీ సమావేశాలు నిర్వహించుకోవడం, ఉమ్మడి మినీ మేనిఫెస్టో ప్రకటించడం వంటి పరిణామాలు గత నెలరోజుల్లో వేగంగా చోటుచేసుకున్నాయి. తాజా భేటీలో సీట్ల కేటాయింపు అంశం చర్చకు వచ్చిందా లేదా అనేది ఇంకా తెలియాల్సి ఉంది. చంద్రబాబు-పవన్‌ కల్యాణ్‌ ఉమ్మడిగా పూర్తిస్థాయి మేనిఫెస్టో ప్రకటిస్తారని ఇప్పటికే ఇరుపార్టీల నేతలూ ప్రకటించినందున ఆ దిశగా ఇరువురు అధినేతల మధ్య చర్చ జరిగి ఉండొచ్చని తెలుస్తోంది.

రాష్ట్రంలో ఓటమి భయంతో వైసీపీ ఓట్ల అక్రమాలకు పాల్పడుతోందనే అంశాన్ని తీవ్రంగా పరిగణిస్తున్న తెలుగుదేశం దిల్లీలో కేంద్ర ఎన్నికల సంఘాన్ని కలిసి ఆధారాలతో సహా ఫిర్యాదు చేయాలని యోచిస్తోంది. ఆ దిశగా ఐక్యపోరాటంపై చంద్రబాబు-పవన్‌ మధ్య చర్చ జరిగి ఉండవచ్చని సమాచారం.