కేరళ తిరువనంతపురానికి చెందిన ఓ ఆటో డ్రైవర్ జాక్పాట్ కొట్టాడు. ఓనం బంపర్ లాటరీలో ఏకంగా రూ.25 కోట్లు గెలుచుకున్నాడు. శనివారం టికెట్ కొన్న అతడికి ఆదివారమే భారీ జాక్పాట్ దక్కడం విశేషం. ఆటో డ్రైవర్గా పనిచేసే అనూప్.. శ్రీవహారం ప్రాంతంలో నివాసం ఉంటున్నాడు. శనివారం టికెట్ కొనేందుకు వెళ్లిన అతడు.. తొలుత వేరే టికెట్ను తీసుకున్నాడు. ఏమనిపించిందో ఏమో గానీ.. తర్వాత ఆ టికెట్ను వెనక్కి ఇచ్చేసి వేరే టికెట్ తీసుకున్నాడు. ఇప్పుడు అదే టికెట్ రూ.25 కోట్లు తెచ్చిపెట్టింది.
నిజానికి అనూప్.. విదేశాలకు వెళ్లే ప్రణాళికల్లో ఉన్నాడు. షెఫ్గా పనిచేసేందుకు మలేసియా వెళ్లేందుకు సిద్ధమయ్యాడు. ఆదివారమే అతడికి బ్యాంకు లోన్ సైతం మంజూరు అయింది. ఇందుకోసం బ్యాంకు అధికారులు తనకు ఫోన్ చేశారని, అయితే లోన్ తనకు వద్దని చెప్పేశానని అనూప్ వివరించాడు. ఇప్పుడు మలేసియా వెళ్లాలన్న ప్లాన్ను సైతం విరమించుకున్నట్లు స్పష్టం చేశాడు.
"22 ఏళ్ల నుంచి నేను లాటరీలు కొంటున్నా. వంద రూపాయల టికెట్ నుంచి రూ.5 వేల ధర ఉండే టికెట్ వరకు చాలా కొన్నా. ఇప్పుడు కూడా నేను గెలుస్తానని అనుకోలేదు. లాటరీ ఫలితాలు కూడా చూడలేదు. తర్వాత నా ఫోన్ చెక్ చేసుకున్నా. నేను గెలిచానని తెలిసింది. నాకు నమ్మకం కలగలేదు. లాటరీ రిజల్ట్స్ను నా భార్యకు చూపించా. ఈ లాటరీకే రూ.25 కోట్లు వచ్చాయని ఆమె నిర్ధరించింది. కానీ నాకు అప్పటికీ ఆశ్చర్యంగానే అనిపించింది. వెంటనే నాకు లాటరీ విక్రయించిన మహిళకు ఫోన్ చేసి అడిగా. నా టికెట్ పంపించా. ఆమె కూడా నేను గెలిచాననే చెప్పింది."
-అనూప్
పన్నులు అన్నీ చెల్లించిన తర్వాత అనూప్ చేతికి రూ.15 కోట్లు రానున్నాయి. ఈ డబ్బుతో ఏం చేస్తారని అడగ్గా.. కొత్త ఇంటిని నిర్మించుకుంటానని చెప్పాడు. ప్రస్తుతం తనకు ఉన్న అప్పులను తీర్చేస్తానని తెలిపాడు. బంధువులకు సహాయం చేసి.. ఛారిటీ కార్యక్రమాలకు కాస్త వెచ్చిస్తానని వివరించాడు. కేరళలో హోటల్ రంగంలోనే ఏదైనా ప్రారంభించాలని అనుకుంటున్నట్లు తెలిపాడు. లాటరీలు కొనడం కొనసాగిస్తానని అనూప్ చెబుతున్నాడు.
ఆదివారం గోర్కీ భవన్లో నిర్వహించిన లక్కీ డ్రాలో విజేతల టికెట్ నెంబర్లను కేరళ ఆర్థిక మంత్రి కేఎన్ బాలగోపాల్ ప్రకటించారు. ఈ ఏడాది రెండోస్థానంలో నిలిచిన వ్యక్తి రూ.5 కోట్లు గెలుచుకున్నాడు. మరో పది మంది.. ఒక్కొక్కరు కోటి రూపాయల చొప్పున జాక్పాట్ కొట్టారు. అయితే, గతేడాది ఓనం బంపర్ లాటరీని సైతం ఆటో డ్రైవరే దక్కించుకోవడం విశేషం.
