జమ్ముకశ్మీర్లోకి చొరబడేందుకు దాదాపు 140 మంది ఉగ్రవాదులు.. నియంత్రణ రేఖ వెంబడి ఎదురు చూస్తున్నారని ఓ సీనియర్ భద్రతా అధికారి తెలిపారు. భారత్, పాక్ మధ్య ఫిబ్రవరిలో కాల్పుల విరమణ ఒప్పందం జరిగినప్పటికీ.. నియంత్రణ రేఖ వద్ద ఉగ్రవాదులకు సంబంధించిన మౌలిక వసతుల నిర్మాణాలు ఇంకా అలానే ఉన్నాయని చెప్పారు.
ఫైనాన్షియల్ యాక్షన్ టాస్క్ ఫోర్స్(ఎఫ్ఏటీఎఫ్) 'గ్రే' జాబితాలో నుంచి బయటపడేందుకు కాల్పులు విరమణ ఒప్పందానికి పాక్ కట్టుబడి ఉండటం అత్యంత ప్రాధాన్యమైన అంశమని సదరు అధికారి పేర్కొన్నారు. ఉగ్రవాదులకు సంబంధించిన మౌలిక వసతులను తొలగిస్తే.. ఈ విషయంలో పాక్ నిబద్ధత నిరూపితమవుతుందని అన్నారు.
"నియంత్రణ రేఖ వద్ద దాదాపు 140 మంది ఉగ్రవాదులు.. భారత్లోని జమ్ముకశ్మీర్లోకి చొరబడేందుకు ఎదురు చూస్తున్నారు. అయితే.. సరిహద్దు వద్ద పటిష్ఠమైన సైన్యం బందోబస్తు వల్ల వారికి ఆ అవకాశం లేకుండా పోయింది. గతంలోకి వారు ఇలాంటి చర్యలకు పాల్పడినప్పుడు మన సైనికులు తిప్పికొట్టారు. దాంతో వారు మళ్లీ అలాంటి యత్నాలు చేయలేదు."
-సీనియర్ భద్రతా అధికారి
కాల్పుల విరమణ ఒప్పందాన్ని సాకుగా చూపి, నియంత్రణ రేఖ వద్ద మౌలిక వసతుల నిర్మాణాన్ని పెంచుకునేందుకు పాకిస్థాన్ యత్నిస్తోందని సదరు అధికారి హెచ్చరించారు. జమ్ముకశ్మీర్కు రెండేళ్ల క్రితం ప్రత్యేక హోదాను ప్రభుత్వ హోదాను రద్దు చేసినప్పటి నుంచి విదేశీ ఉగ్రవాదులు కనమరుగయ్యారని చెప్పారు. రహస్య ప్రదేశాల్లో వారు దాక్కున్నారని పేర్కొన్నారు. స్థానికులెవరూ ఉగ్రవాదులతో చేతులు కలపకుండా ఉండేలా.. వారి మానసిక స్థితిని మార్చేందుకు సైన్యం చర్యలు తీసుకుంటోందని చెప్పారు.