ఇద్దరు పిల్లలను బావిలోకి తోసి చంపిన తండ్రి Gaddi gudem murder case : కుటుంబ కలహాల కారణంగా ఇద్దరు పిల్లలను తండ్రే.. బావిలో తోసి చంపిన ఘటన తెలంగాణలోని మహబూబాబాద్ జిల్లాలో జరిగింది. గడ్డిగూడెం తండాకు చెందిన రామ్ కుమార్... పదేళ్ల క్రితం అదే తండాకు చెందిన శిరీషను ప్రేమ వివాహం చేసుకున్నాడు. ముంబయిలో సీఐఎస్ఎఫ్ కానిస్టేబుల్గా పని చేస్తున్న అతడు... మూడు రోజుల క్రితం సెలవుపై వచ్చాడు. రామ్కుమార్ భార్య... రాత్రి గడ్డిగూడెం తండాలోని పుట్టింటికి వెళ్లింది. ఉదయం పిల్లలను బైక్‌పై పొలం వద్దకు తీసుకెళ్లిన రామ్కుమార్... తన పొలంలోని బావిలో ఇద్దరు పిల్లలను తోసేశాడు.
కుమారుడి పుట్టినరోజుకు ఒకరోజు ముందు తండ్రి దారుణానికి ఒడిగట్టినట్లు కుటుంబ సభ్యులు తెలిపారు. ఎనిమిదేళ్ల అమీ జాక్సన్‌, ఆరేళ్ల జానీ బెస్టోల మృతితో తల్లి, ఇతర కుటుంబ సభ్యులు కన్నీటి పర్యంతమవుతున్నారు. పిల్లల పట్ల ఇంతటి దారుణానికి ఒడిగడతాడని అనుకోలేదని ఆ పిల్లల తల్లి గుండెలవిసేలా విలపిస్తోంది.
భూక్యా రామ్ కుమార్... సీఐఎస్ఎఫ్ కానిస్టేబుల్గా పని చేస్తున్నాడు. ఇతను భార్యాపిల్లలతోటి 4 రోజుల క్రితం గడ్డిగూడెంకు వచ్చాడు. భార్య తల్లిగారి ఇల్లు రామ్ కుమార్ ఇంటికి ఎదురుగానే ఉంటుంది. భార్యాభర్తల మధ్య చిన్న గొడవ జరిగితే భర్త దగ్గర పిల్లలను వదిలేసి వెళ్లింది. రామ్ కుమార్ తన ఇద్దరు పిల్లలను వ్యవసాయం పొలం దగ్గరకు తీసుకెళ్తానని ఇంట్లో చెప్పి... తీసుకొచ్చి వ్యవసాయ బావిలో తోసేసి చంపేశాడు. ఇంట్లో డబ్బులు ఇవ్వడం లేదని, గోల్డ్ లోన్ వంటి విషయాల్లో భార్యాభర్తల మధ్య జరిగిన గొడవల కారణంగానే ఇంతటి దారుణానికి పాల్పడ్డాడు. పిల్లలను బావిలో తోసేసి పారిపోయాడు. వీలైనంత త్వరగా అతడిని పట్టుకుంటాం.
-రవికుమార్, మహబూబాబాద్ రూరల్ సీఐ
