GT VS MI IPL 2024 : సూపర్ సండేలో భాగంగా ఆదివారం ముంబయి ఇండియన్స్ - గుజరాత్ టైటాన్స్ మధ్య మ్యాచ్ ఉత్కంఠగా సాగింది. ఈ మ్యాచ్లో గెలిచి గుజరాత్ టైటాన్స్ బోణీ కొట్టింది. 6 పరుగుల తేడాతో ముంబయి ఇండియన్స్‌పై గెలిచింది. వాస్తవానికి 169 పరుగుల ఛేదనలో ముంబయి ఇండియన్స్ 12 ఓవర్లలో 107/2 స్కోరు చేసింది. క్రీజులో నిలదొక్కుకుని దూకుడుగా రోహిత్, బ్రెవిస్‌ ఉండడంతో గెలుపు ఆ జట్టుదే అని అంతా అనుకున్నారు. కానీ అనంతరం అద్భుతంగా పుంజుకున్న గుజరాత్ టైటాన్స్ కట్టుదిట్టమైన బౌలింగ్‌తో ముంబయికి కళ్లెం వేసి టోర్నీలో శుభారంభం చేసింది. బంతితో బుమ్రా చేసిన మ్యాజిక్ వృథా అయింది.
మ్యాచ్ సాగిందిలా: బుమ్రా (3/14) అద్భుతంగా బౌలింగ్ చేయడం వల్ల మొదట టాస్ ఓడి బ్యాటింగ్కు దిగిన గుజరాత్ టైటాన్స్ 168/6 స్కోరుకే పరిమితమైంది. సాయి సుదర్శన్ (39 బంతుల్లో 3×4, 1×6 సాయంతో 45 పరుగులు) టాప్‌ స్కోరర్గా నిలిటాడు. శుభ్‌మన్‌ గిల్ (22 బంతుల్లో 3×4, 1×6 సాయంతో 31 పరుగులు) చేశాడు. రాహుల్ తెవాటియా (22), వృద్ధీమాన్‌ సాహా (19), ఒమర్జాయ్ (17), మిల్లర్ (12) పరుగులు చేశారు. ఇంకా ముంబయి బౌలర్లలో జస్ప్రీత్ బుమ్రాతో 3 పాటు గెరాల్డ్ కొయెట్జీ 2, పీయూష్ చావ్లా ఒక వికెట్ పడగొట్టారు.
ఛేదనలో ముంబయి ఇండియన్స్ 9 వికెట్లకు 162 పరుగులే చేయగలిగింది. రోహిత్ శర్మ (29 బంతుల్లో 7×4, 1×6 సాయంతో 43 పరుగులు), బ్రెవిస్‌ (38 బంతుల్లో 2×4, 3×6 సాయంతో 46 పరుగులు) బాగానే రాణించారు. దీంతో ఓ దశలో ముంబయి గెలిచేలా కనిపించింది. కానీ ఆ తర్వాత అనూహ్యంగా దెబ్బతింది. దూకుడు ప్రదర్శనతో అర్థ సెంచరీకి చేరువలో ఉన్న సమయంలో రోహిత్ వెనుతిరిగాడు. సాయి కిశోర్ బౌలింగ్లో ఔటై పెవిలియన్ బాట పట్టాడు. ఇషాన్ కిషన్ ఒక్క రన్ కూడా చేయకుండానే ఔటయ్యాడు. అజ్మతుల్లా (2/27), మోహిత్ శర్మ (2/32), స్పెన్సర్ జాన్సన్ (2/25), ఉమేశ్‌ (2/31) ముంబయి జట్టు దూకుడు ప్రదర్శనకు కళ్లెం వేశారు.