'కంట్రోల్​ కోల్పోయిన అమిత్​ షా హెలికాప్టర్, గాల్లో ఊగిసలాట'- క్లారిటీ ఇచ్చిన కేంద్ర హోం శాఖ - Amit Shah Helicoptor Loses Control

Amit Shah Helicoptor Loses Control : కేంద్ర హోంమంత్రి అమిత్ షా ప్రయాణిస్తున్న హెలికాప్టర్‌ టేకాఫ్‌ క్రమంలో కొంతసేపు నియంత్రణ కోల్పోయినట్లు వార్తలను హోం శాఖ కార్యాలయం ఖండించింది. అలాంటిదేమీ జరగలేదని స్పష్టం చేసింది.

Amit Shah Helicoptor Loses Control :కేంద్ర హోంమంత్రి, బీజేపీ అగ్రనేత అమిత్ షాకు త్రుటిలో హెలికాప్టర్​ ప్రమాదం తప్పిందని వచ్చిన వార్తలను హోం శాఖ ఖండించింది. అలాంటిదేమీ జరగలేదని పేర్కొంది. " కేంద్ర హోం మంత్రి హెలికాప్టర్ బీహార్‌లోని బెగుసరయ్​ నుంచి బయలుదేరుతున్నప్పుడు కొంత బ్యాలెన్స్ సమస్య ఉందని కొన్ని వార్తా సంస్థలు నివేదించాయి. అలాంటి సమస్యలు ఏమీ లేవని దయచేసి గమనించండి." అని హోం శాఖ ఓ ప్రకటనలో పేర్కొంది.

అయితే అంతకుముందు, హోం మంత్రి అమిత్​ షా ప్రయాణిస్తున్న హెలికాప్టర్‌ టేకాఫ్‌ సమయంలో కొంతసేపు నియంత్రణ కోల్పోయిందని వార్తలు వచ్చాయి. 'బిహార్‌లోని ఎన్నికల ర్యాలీలో పాల్గొన్న అమిత్‌ షా ప్రచారం ముగించుకుని హెలికాప్టర్‌లో బయల్దేరారు. టేకాఫ్‌ క్రమంలో హెలికాప్టర్​ నియంత్రణ కోల్పోయి కుడివైపు దిశగా కొంతసేపు ఊగిసలాడింది. ఒక దశలో నేలను తాకబోయింది. వెంటనే అప్రమత్తమైన పైలట్‌ హెలికాప్టర్‌ను కంట్రోల్‌ చేశాడు. దీంతో అది నిర్ణీత మార్గంలో బయల్దేరింది.' అనే నివేదికలు వైరల్ అయ్యాయి. తాజాగా ఈ నివేదికలు నిజం కాదని హోం శాఖ తెలిపింది.

గత వారం అమిత్ షా ప్రయాణిస్తున్న హెలికాప్టర్‌కు ప్రతికూల వాతావరణం వల్ల ఇబ్బందులు ఎదురయ్యాయి. ఆ కారణంగా కిందకు దిగలేకపోయింది. ఏప్రిల్‌ 21న బంగాల్‌లోని డార్జిలింగ్‌లో ఎన్నికల ప్రచారం చేపట్టేందుకు కేంద్ర మంత్రి వెళ్లారు. అయితే, వాతావరణం అనుకూలించకపోవడం వల్ల హెలికాప్టర్‌ ల్యాండింగ్‌ విఫలమైంది. దీంతో ఆ పర్యటనను అమిత్​ షా రద్దు చేసుకోవాల్సి వచ్చింది.