ଜରୁରୀ ପରିସ୍ଥିତିରେ ସୀମିତ ବ୍ୟବହାର ପାଇଁ ସ୍ପୁଟନିକ୍ ଭି ଟିକା ଆମଦାନୀ କରିବା ପାଇଁ ଭାରତର ଡ୍ରଗସ୍ କଣ୍ଟ୍ରୋଲର ଜେନେରାଲ (ଡିସିଜିଆଇ) ଅନୁମତି ପ୍ରଦାନ କରିଛି । ହାଇଦ୍ରାବାଦସ୍ଥିତ ଦେଶର ପ୍ରମୁଖ ଔଷଧ କମ୍ପାନି ଡକ୍ଟର ରେଡିସ୍ ଲାବୋରଟୋରିଜ (ଡିଆରଏଲ୍) ଏହି ଅନୁମତି ପାଇଥିବା ଘୋଷଣା କରିଛି । କୋଭିଡ-ଟିକା ସ୍ପୁଟନିକ୍ ଭି ସମ୍ପର୍କରେ ଆପଣ ଯାହା ଜାଣିବାକୁ ଚାହାଁନ୍ତି ସେ ନେଇ କିଛି ତଥ୍ୟ ଜାଣନ୍ତୁ ।
କୋଭିସିଲଡ ଏବଂ କୋଭାକ୍ସିନ ପରେ ଆସୁଛି ସ୍ପୁଟନିକ୍ ଭି। ଏହି କୋଭିଡ ଟିକା ମସ୍କୋର ଗାମାଲେୟା ନ୍ୟାସନାଲ ରିସର୍ଚ୍ଚ ଇନିଷ୍ଟିଚ୍ୟୁଟ୍ ଅଫ୍ ଏପିଡେମିଓଲୋଜି ଏବଂ ମାଇକ୍ରୋବାୟୋଲୋଜି ଦ୍ବାରା ପ୍ରସ୍ତୁତ କରାଯାଇଛି । ଏହା ହେଉଛି ତୃତୀୟ କୋଭିଡ-19 ଟିକା ଯାହାକୁ କି ଭାରତରେ ଜରୁରୀ ପରିସ୍ଥିତିରେ ବ୍ୟବହାର ପାଇଁ ଅନୁମତି ଦିଆଯାଇଛି ।
ପ୍ରକାଶିତ ନିୟମାବଳୀ ଅନୁଯାୟୀ, 18 ବର୍ଷରୁ ଅଧିକ ବୟସ୍କର ବ୍ୟକ୍ତିଙ୍କ ଶରୀରରେ କୋଭିଡ-19 ପ୍ରତିରୋଧକ ଶକ୍ତି ବୃଦ୍ଧି କରିବା ପାଇଁ ଏହି ଟିକା ଉଦ୍ଦିଷ୍ଟ ଏବଂ ଏହାକୁ ତରଳ ଆକାରରେ ମାଇନସ 18 ଡିଗ୍ରୀ ସେଲସିୟସରେ ସଂରକ୍ଷଣ କରି ରଖିବା ଆବଶ୍ୟକ । ଅବଶ୍ୟ ଏହାକୁ ଡି ଫ୍ରିଜ୍ କରି 2ରୁ 8 ଡିଗ୍ରୀ ସେଣ୍ଟିଗ୍ରେଡରେ ରଖାଯାଇପାରିବ, ଫଳରେ ଏହାକୁ ସୁବିଧାରେ ପରିବହନ କରିବା ସହିତ ଗଚ୍ଛିତ ରଖିହେବ । ଲାନସେଟ୍ ପତ୍ରିକାରେ ନିକଟରେ ପ୍ରକାଶିତ ଏକ ଅଧ୍ୟୟନ ଅନୁଯାୟୀ ସ୍ପୁଟନିକ୍ ଭି’ 91.6 ପ୍ରତିଶତ ଫଳପ୍ରଦ ବୋଲି ପ୍ରମାଣିତ ହୋଇଛି ।
ଅଖିଳ ଭାରତ ଆୟୁର୍ବିଜ୍ଞାନ ପ୍ରତିଷ୍ଠାନ (ଏମସ), ନୁଆଦିଲ୍ଲୀର ସେଣ୍ଟର ଫର୍ କମ୍ୟୁନିଟି ମେଡିସିନର ଆସୋସିଏଟ୍ ପ୍ରଫେସର ଏଚ.ଆର.ସାଲଭେ ଆଇଏଏନଏସକୁ କହିଛନ୍ତି ଯେ, ଭାରତୀୟ ଲୋକଙ୍କ ମଧ୍ୟରେ ଏହା କେତେଦୂର ଫଳପ୍ରଦ ସେ ନେଇ ପ୍ରମାଣ ସଂଗ୍ରହ କରିବା ଆବଶ୍ୟକ । ଟିକାକରଣ ଅଭିଯାନକୁ ଅଧିକ ବଢାଇବା ପାଇଁ ସ୍ପୁଟନିକ ଭି ଦେଶ ପାଇଁ ଆଉ ଏକ ବିକଳ୍ପ ଯୋଗାଇ ଦେଇଛି ।