କେନ୍ଦୁଝର:ଓଡିଶା ରାଜ୍ୟ ସରକାର କର୍ମଚାରୀ ସମନ୍ବୟ ସମିତି କେନ୍ଦୁଝର ଶାଖା ପକ୍ଷରୁ ୧୮ତମ ସମ୍ମିଳନୀ ଅନୁଷ୍ଠିତ । ୧୦ ଦଫା ଦାବି ନେଇ ଓଡିଶା ସରକାରଙ୍କ ଅଧିନରେ କାମ କରୁଥିବା କର୍ମଚାରୀ ସଂଘର ସଦସ୍ୟ ସ୍ଥାନୀୟ ସଂସ୍କୃତି ଭବନଠାରେ ବୈଠକ କରିଛନ୍ତି । ସ୍ଥାୟୀ ଚାକିରୀ ନେଇ କର୍ମଚାରୀଙ୍କ ସମନ୍ଵୟ ସମିତି(Odisha State Govt Employees Coordination Committee) ପକ୍ଷରୁ ବାରମ୍ବାର ସରକାରଙ୍କ ନିକଟରେ ଦାବି କରାଯାଇଛି । ମାତ୍ର ଆଜି ପର୍ଯ୍ୟନ୍ତ କୌଣସି ସୁଫଳ ନମିଳିନଥିବା ଅଭିଯୋଗ ହୋଇଛି ।
ପୁରୁଣା ପେନ୍ସନ(Old Pension Policy), ଅସ୍ଥାୟୀ କର୍ମଚାରୀଙ୍କୁ ସ୍ଥାୟୀ, ଖାଲି ପଦବୀ ପୂରଣ, ବକେୟା ମହଙ୍ଗା ଭତ୍ତା ପ୍ରଦାନ, ସଂଶୋଧିତ ଘରଭଡା ପ୍ରଦାନ, ଅବସରକାଳୀନ ବୟସ ସୀମା ବୃଦ୍ଧି ଆଦି ଦାବି ରଖିଛି ଓଡିଶା କର୍ମଚାରୀ ସମନ୍ବୟ ସମିତି । ଆୟୋଜିତ ସମ୍ମିଳନୀରେ ଆଗାମୀ ସେପ୍ଟେମ୍ବର ୨୧ରେ କେନ୍ଦ୍ରୀୟ ସମ୍ମିଳନୀରେ ଯୋଗଦେବାକୁ କେନ୍ଦୁଝର ଶାଖା ପକ୍ଷରୁ ଆହ୍ୱାନ ଦିଆଯାଇଛି ।
ସରକାର ସମସ୍ତ ୧୦ ଦଫା ଦାବି ଶୀଘ୍ର ପୂରଣ ନକଲେ ଆନ୍ଦୋଳନକୁ ତୀବ୍ରତର କରାଯିବ ବୋଲି ଚେତାବନୀ ଦେଇଛି କର୍ମଚାରୀ ସମନ୍ବୟ ସମିତି ।