ଯାଜପୁର: ଜିଲ୍ଲାର ଧର୍ମଶାଳା ବ୍ଲକ ଅନ୍ତର୍ଗତ 5T ରୂପାନ୍ତରିତ ସ୍କୁଲରେ ଅବ୍ୟବସ୍ଥା । ସରକାର ଶିକ୍ଷା ଭିତ୍ତିଭୂମିକୁ ସୁଦୃଢ କରିବା ଲାଗି ଅନେକ ବ୍ୟବସ୍ଥା କରୁଥିବା ବେଳେ ଏଠାରେ କିନ୍ତୁ ଫେଲ ମାରିଛି ଯୋଜନା । ଧର୍ମଶାଳା ବ୍ଲକ ଅଣ୍ଟିଆସ୍ଥିତ ପଞ୍ଚାୟତ ହିଙ୍ଗୁଳା ଉଚ୍ଚ ବିଦ୍ୟାପୀଠରେ କବାଟକୁ କଳାପଟା ରୂପେ ବ୍ୟବହାର କରାଯାଇଛି (Door used as Black Board in a 5t School of Jajpur)। ଶିକ୍ଷକ କବାଟରେ ଲେଖି ଛାତ୍ରଛାତ୍ରୀଙ୍କୁ ପାଠ ପଢାଉଥିବା ସମୟର ଭିଡ଼ିଓ ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି । ଫଳରେ ପିଲାଙ୍କ ସାଧାରଣ ଶିକ୍ଷା ନେଇ ଉଠିଛି ପ୍ରଶ୍ନ ।
ବିଦ୍ୟାଳୟରେ ଅଷ୍ଟମ, ନବମ ଶ୍ରେଣୀର ପରୀକ୍ଷା ପାଇଁ ଏଭଳି କବାଟରେ ଶିକ୍ଷକ ପ୍ରଶ୍ନପତ୍ର ଲେଖୁଥିବା ଦେଖିବାକୁ ମିଳିଛି । ସୂଚନା ଅନୁଯାୟୀ ସୋମବାର ଏହି ସ୍କୁଲର ପ୍ରଥମରୁ ଅଷ୍ଟମ ଯାଏଁ ପିଲାଙ୍କ ପରୀକ୍ଷା ଥିଲା । ହେଲେ ସ୍କୁଲ କର୍ତ୍ତୃପକ୍ଷଙ୍କ ଅବହେଳା ଯୋଗୁଁ ପ୍ରଶ୍ନପତ୍ର ଯୋଗାଡ଼ ହୋଇ ପାରିନଥିଲା । ଫଳରେ ପିଲାମାନଙ୍କୁ ଉତ୍ତର ଖାତା ଦିଆଯାଇ କବାଟରେ ପ୍ରଶ୍ନ ଲେଖାଯାଇଥିଲା । ଯାହାକୁ ଦେଖି ପିଲାମାନେ ଉତ୍ତର ଲେଖିଥିଲେ । ତେବେ ସ୍କୁଲରେ ବ୍ଲାକ ବୋର୍ଡ ନଥିବାରୁ ଶିକ୍ଷକମାନେ କବାଟକୁ ବ୍ଲାକ ବୋର୍ଡ ଭାବେ ବ୍ୟବହାର କରୁଥିବା ଦେଖିବାକୁ ମିଳିଛି ।