କଟକ:ଶାରଦୀୟ ଦୁର୍ଗା ପୂଜା ପାଇଁ ଚଳଚଞ୍ଚଳ କଟକ ସହର । ଏଥିପାଇଁ ସମସ୍ତ ପୂଜା ମଣ୍ଡପମାନଙ୍କରେ ପ୍ରସ୍ତୁତ ଜୋରସୋରରେ ଚାଲିଛି । କହିବାକୁ ଗଲେ ଆଉ ମାତ୍ର 15 ଦିନ ପରେ ଆରମ୍ଭ ହେବ ଶାରଦୀୟ ଦୁର୍ଗା ପୂଜା । ତେବେ କଟକରେ ଦଶହରା ପୂଜା ଦେଖିବାକୁ ସହରରେ ଲକ୍ଷାଧିକ ଲୋକ ସମାଗମ ହେବ । ଏହାକୁ ନେଇ ସିଏମସିରେ କାଉନସିଲ ବୈଠକ ବସିଥିଲା । ସମସ୍ତ ୱାର୍ଡର କର୍ପୋରେଟରମାନେ ବିଭିନ୍ନ ନିର୍ମାଣ କାର୍ଯ୍ୟକୁ ନେଇ କ୍ଷୋଭ ପ୍ରକଟ କରିଛନ୍ତି । ପୂଜା ପୂର୍ବରୁ କଟକ ପ୍ରସ୍ତୁତ କି ନାହିଁ ବୋଲି ପ୍ରଶ୍ନ କରିଛନ୍ତି ବିରୋଧୀ ଦଳ କର୍ପୋରେଟର ।
ବିଜେପି କର୍ପୋରେଟର ଗଗନ ଓଝା କହିଛନ୍ତି, ‘‘ଶାରଦୀୟ ଦୁର୍ଗାପୂଜା ପାଇଁ କଟକରେ ଶ୍ରଦ୍ଧାଳୁଙ୍କ ସମାଗମ ଦେଖିବାକୁ ମିଳିଥାଏ । ଏଥିପାଇଁ ଆଗୁଆ ଜିଲ୍ଲା ପ୍ରଶାସନ ଓ ସିଏମସି ବିଭିନ୍ନ ପ୍ରସ୍ତୁତି କରିଥାନ୍ତି । ମାତ୍ର ଚଳିତ ବର୍ଷ ଲକ୍ଷାଧିକ ଶ୍ରଦ୍ଧାଳୁଙ୍କୁ ସ୍ବାଗତ କରିବା ପାଇଁ ପ୍ରସ୍ତୁତ ହୋଇ ନାହିଁ କଟକ ସହର । ରାସ୍ତା ଘାଟ, ବିଦ୍ୟୁତ, ପାନୀୟ ଜଳ, ଶୌଚାଳୟ ଆଦି ସର୍ବ ନିମ୍ନ ଭିତ୍ତିଭୂମିର ଅଵସ୍ଥା ଅତ୍ୟନ୍ତ ଶୋଚନୀୟ ଅବସ୍ଥାରେ ରହିଛି । କେଉଁଠି କେଉଁଠି ପୂଜା ମଣ୍ଡପ ଆଗରେ ଥିବା ରାସ୍ତାର ଅବସ୍ଥା ବି ନ କହିବା ଭଲ । ଅନେକ ସ୍ଥାନରେ ଥିବା ରାସ୍ତା ପୂରା ଶୋଚନୀୟ ଅବସ୍ଥାରେ ପ଼ଡିରହିଛି । ’’
କଂଗ୍ରେସ କର୍ପୋରେଟର ସନ୍ତୋଷ ଭୋଳ କହିଛନ୍ତି, ‘‘ ପୂଜା ପାଇଁ ହାତରେ ଆଉ କମ ସମୟ ରହିଥିବା ବେଳେ ଭିତ୍ତିଭୂମି ସଜାଡ଼ିବା କାମ ଏଯାବତ ଆରମ୍ଭ ହୋଇ ନାହିଁ । କେବଳ ଯେ ରାସ୍ତାଘାଟ ନୁହେଁ ବରଂ ପିଇବା ପାଣିର ବି ଗୁରୁତର ସମସ୍ୟା ରହିଛି । ଏନେଇ ଅଫିସରଙ୍କୁ ଅଭିଯୋଗ କଲେ ବି ଏଥିପ୍ରତି କେହି ଶୁଣୁ ନାହାଁନ୍ତି ।’’