ଦୁର୍ଗାପୂଜା ଭସାଣି ଉପରେ ପ୍ରଶାସନର ରୋକ: ଅନୁମତି ପାଇଁ ଜିଲ୍ଲାପାଳଙ୍କୁ ଭେଟିଲେ ପୂଜା କମିଟି

ସମ୍ବଲପୁରରେ ଭସାଣି ଶୋଭାଯାତ୍ରା ନେଇ ଜିଲ୍ଲା ପୋଲିସ ପ୍ରଶାସନର ରୋକ । ଅନୁମତି ପାଇଁ ଜିଲ୍ଲା ପ୍ରଶାସନକୁ ଭେଟି ଆଲୋଚନା କରିଛି ଦୁର୍ଗାପୂଜା କମିଟି । ଅଧିକ ପଢନ୍ତୁ

ସମ୍ବଲପୁର : ସମ୍ବଲପୁରରେ ହେବନି ଭସାଣି ଶୋଭାଯାତ୍ରା । ମହାନଗର ନିଗମ ଅଞ୍ଚଳରେ ଜିଲ୍ଲା ପୋଲିସ ପ୍ରଶାସନ ଏହିଭଳି ଧାର୍ମିକ ଶୋଭାଯାତ୍ରା ଉପରେ ବର୍ତ୍ତମାନ ପରିସ୍ଥିତିରେ ରୋକ ଲଗାଇଛି l ଗଣେଶ ପୂଜା, ଦୁର୍ଗା ପୂଜା, ବିଶ୍ଵକର୍ମା ପୂଜା ହେବ କିନ୍ତୁ ହେବନି ଭସାଣି ଶୋଭାଯାତ୍ରା l ଏଭଳି ନିଷ୍ପତି ନେଇଛି ସମ୍ବଲପୁର ପୋଲିସ ପ୍ରଶାସନ l ତେବେ ଜିଲ୍ଲା ପୋଲିସ ବିଭାଗର ଏଭଳି ନିଷ୍ପତି ପରେ ଏନେଇ ଚିନ୍ତାରେ ମହାନଗର ନିଗମ ଅଞ୍ଚଳର ଦୁର୍ଗାପୂଜା କମିଟି । ତେଣୁ ଦୁର୍ଗାପୂଜା କମିଟି ଏକ ମିଳିତ କ୍ରିୟାନୁଷ୍ଠାନ କମିଟି ଗଠନ କରି ଜିଲ୍ଲାପାଳଙ୍କୁ ଭେଟି ଆଲୋଚନା କରିଛନ୍ତି l

ତେବେ ସମ୍ବଲପୁରରେ ଦୁର୍ଗାପୂଜାରେ ଭସାଣି ଶୋଭଯାତ୍ରା ଅତି ଯାକଯମକରେ ହୋଇଥାଏ l ହେଲେ ଏଥର ଭସାଣି ଶୋଭାଯାତ୍ରା ହୋଇ ପାରିବ ନାହିଁ ବୋଲି ଜିଲ୍ଲା ପୋଲିସ ବିଭାଗ ପକ୍ଷରୁ ରୋକ ଲଗାଯାଇଛି l ଏଭଳି ସ୍ଥିତିରେ ଗତକାଲି ସମ୍ବଲପୁର ମହାନଗର ନିଗମର ସମସ୍ତ ଦୁର୍ଗାପୂଜା କମିଟିର ସଦସ୍ୟମାନେ ଏକାଠି ହୋଇ ସମ୍ବଲପୁର ଜିଲ୍ଲାପାଳଙ୍କୁ ଭେଟି ଏକ ଲିଖିତ ଦାବିପତ୍ର ପ୍ରଦାନ କରିଛନ୍ତି । ଏଥିସହ ଦୁର୍ଗାପୂଜା ଭସାଣି ଶୋଭାଯାତ୍ରା କରିବାକୁ ଅନୁମତି ଦେବାକୁ ଦାବି କରିଛନ୍ତି । ଏନେଇ ସମ୍ବଲପୁର ଜିଲ୍ଲାପାଳ ନିଜେ କୌଣସି ସ୍ପଷ୍ଟ ମତ ଦେଇ ନାହାଁନ୍ତି ।

ସୂଚନାଯୋଗ୍ୟ ଯେ, ଗତ ଏପ୍ରିଲ 12 ତାରିଖରେ ହନୁମାନ ଜୟନ୍ତୀ ବାଇକ୍‌ ଶୋଭାଯାତ୍ରା ଚାଲିଥିବା ବେଳେ ଏକ ନିର୍ଦ୍ଦିଷ୍ଟ ଅଞ୍ଚଳରେ ନିର୍ଦ୍ଦିଷ୍ଟ ସମ୍ପ୍ରଦାୟ ପକ୍ଷରୁ ପଥର ମାଡ଼ ହୋଇଥିଲା l ଏହି ଘଟଣାରେ ଧନୁପାଲି ଥାନା ଅଧିକାରୀଙ୍କ ସହ ବହୁ ପୋଲିସ ଓ ଶୋଭାଯାତ୍ରାରେ ସାମିଲ ଯୁବକ ଗୁରୁତର ଆହତ ହୋଇଥିଲେ l ଏହାପରେ ଏପ୍ରିଲ 14 ତାରିଖରେ ଏହାର ପ୍ରତିକ୍ରିୟା ସ୍ୱରୂପ ହିଂସାକାଣ୍ଡ ହୋଇଥିଲା ଓ ସେହିଦିନ ଜଣେ ଆଦିବାସୀ ଯୁବକଙ୍କ ହତ୍ୟା ମଧ୍ୟ ହୋଇଥିଲା । ସେହିପରି ଜଣେ ହରିଜନ ଯୁବକଙ୍କ ହାତ ଆଙ୍ଗୁଠି କଟି ଯାଇ ଗୁରୁତର ଆହତ ହୋଇଥିଲେ l ଏହି ଘଟଣାରେ ଏକ ନିର୍ଦ୍ଧିଷ୍ଟ ସମ୍ପ୍ରଦାୟର ଲୋକେ ସମ୍ପୃକ୍ତ ଥିବା ସେତେବେଳେ ବିଭିନ୍ନ ମହଲରେ ଚର୍ଚ୍ଚା ହୋଇଥିବା ବେଳେ ଜିଲ୍ଲା ପ୍ରଶାସନ ଏହାକୁ ଖଣ୍ଡନ କରିଥିଲା l ତେବେ ଏହି ଘଟଣାକୁ ନେଇ ଜାତୀୟ ST ଓ SC କମିଶନର ଟିମ୍‌ ସମ୍ବଲପୁର ପରିଦର୍ଶନ କରି ସମ୍ବଲପୁର ଜିଲ୍ଲାପାଳ ଓ ଏସପିଙ୍କୁ ଜବାବ ତଳବ କରିଥିଲା l ଏହିଭଳି ସ୍ଥିତିରେ ବର୍ତ୍ତମାନ ଜିଲ୍ଲା ପ୍ରଶାସନ କୌଣସି ବି ଧାର୍ମିକ ଶୋଭାଯାତ୍ରାକୁ ଅନୁମତି ଦେଇ ଅଡୁଆରେ ପଡ଼ିବାକୁ ଚାହୁଁ ନଥିବା ଚର୍ଚ୍ଚା ହେଉଛି l

ଇଟିଭି ଭାରତ, ସମ୍ବଲପୁର