ଦୁବାଇ:ନ୍ୟୁଜିଲାଣ୍ଡ ବିପକ୍ଷରେ ପ୍ରଥମେ ଟସ୍ ଜିତି ବୋଲିଂ କରିବାକୁ ନିଷ୍ପତ୍ତି ନେଇଛି ସ୍କଟଲାଣ୍ଡ ଦଳ । ଏହି ମ୍ୟାଚ ପାଇଁ ସ୍କଟଲାଣ୍ଡ ଦଳରେ ଦୁଇଟି ପରିବର୍ତ୍ତନ କରାଯାଇଛି । ଅଧିନାୟକ କାଇଲ କୁଜର ଓ ଆଲସାଡର ଇଭାନ ଚୂଡ଼ାନ୍ତ ଏକାଦଶକୁ ପ୍ରତ୍ୟାବର୍ତ୍ତନ କରିଛନ୍ତି । ଏହି ଟୁର୍ଣ୍ଣାମେଣ୍ଟ ବର୍ତ୍ତମାନ ସୁଦ୍ଧା ଗୋଟିଏ ମଧ୍ୟ ମ୍ୟାଚ ବିଜୟୀ ହୋଇ ପାରିନାହିଁ ସ୍କଟଲାଣ୍ଡ ଦଳ । ସେପଟେ ପୂର୍ବ ମ୍ୟାଚରେ ଭାରତକୁ ମାତ ଦେଇ ନ୍ୟୁଜିଲାଣ୍ଡର ମନୋବଳ ସୁଦୃଢ଼ ରହିଛି ।
ଏହି ମ୍ୟାଚରେ ସ୍କଟଲାଣ୍ଡ ପାଖରେ କିଛି ହରାଇବାକୁ ନାହିଁ । କିନ୍ତୁ ଏହି ମ୍ୟାଚରେ ବିଜୟୀ ହେଲେ ନ୍ୟୁଜିଲାଣ୍ଡର ସେମିଫାଇନାଲ ରାସ୍ତା ସହଜ ହୋଇ ପାରିବ । ପୂର୍ବରୁ ଏହି ଗ୍ରୁପରେ ଦମଦାର ପ୍ରଦର୍ଶନ କରି ପାକିସ୍ତାନ ସେମିଫାଇନାଲରେ ସ୍ଥାନ ପକ୍କା କରି ସାରିଛି । ଆଉ ଗୋଟିଏ ଦଳ ଏହି ଗ୍ରୁପରୁ ସେମିଫାଇନାଲକୁ ଉନ୍ନୀିତ ହେବ ।
ଟସ୍ ଜିତିବା ପରେ ସ୍କଟଲାଣ୍ଡର ଅଧିନାୟକ କାଇଲ କୁଜର କହିଛନ୍ତି ଯେ, "ଆମେ ପ୍ରଥମେ ବୋଲିଂ କରିବାକୁ ପସନ୍ଦ କରିବୁ । ବର୍ତ୍ତମାନ ସୁଦ୍ଧା ଟୁର୍ଣ୍ଣାମେଣ୍ଟରେ ଟାର୍ଗେଟ ଦେଇ ମ୍ୟାଚ ବିଜୟୀ ହେବା କଷ୍ଟକର ଦେଖା ଦେଇଛି । ଆହତ ଜନିତ ସମସ୍ୟା ଯୋଗୁଁ ଏହି ମ୍ୟାଚରୁ ଡାଭି ଓ ୱାଲେସଙ୍କୁ ବିଶ୍ରାମ ଦିଆଯାଇଛି । ଆମେ ଚ୍ୟାଲେଞ୍ଜ ନେବାକୁ ପ୍ରସ୍ତୁତ ଅଛୁ । ଆମେ କୌଣସି ଦଳକୁ ଭୟ କରୁନାହୁଁ । ପଡ଼ିଆରେ ଆମେ ଆମର ପ୍ରକୃତ ଖେଳ ପ୍ରଦର୍ଶନ ଉପରେ ଅଧିକ ଧ୍ୟାନ ଦେବାକୁ ଚେଷ୍ଟା କରିବୁ । ଆମ ଫ୍ୟାନମାଙ୍କୁ ଖୁସି ଦେବାକୁ ଯଥା ସମ୍ଭବ ଚେଷ୍ଟା କରିବୁ ।"
ସେପଟେ ନ୍ୟୁଜିଲାଣ୍ଡ ଅଧିନାୟକ କେନ ୱିଲିୟମସନ୍ କହିଛନ୍ତି ଯେ, "ଆମେ ବି ପ୍ରଥମେ ବୋଲିଂ କରିବାକୁ ଚାହୁଁଥିଲୁ । ଏହି ପିଚ୍ ବ୍ୟାଟିଂ ପାଇଁ ଅନୂକୁଳ ମନେ ହେଉଛି । ତେବେ ଆଜି ଆମେ ଭଲ ପ୍ରଦର୍ଶନ କରିବାକୁ ଚେଷ୍ଟା କରିବୁ । ଆମେ ଆମ ଷ୍ଟାଣ୍ଡାର୍ଡ ବଢାଇବାକୁ ଚେଷ୍ଟା କରିବୁ । ଆମ ଖେଳାଳିମାନେ ବିଭିନ୍ନ ରୋଲରେ ଭଲ ପ୍ରଦର୍ଶନ କରିଛନ୍ତି । ଆଜି ମଧ୍ୟ ତାହା କରିବାକୁ ଆମର ଚେଷ୍ଟା ରହିବ ।"