ହାଇଦ୍ରାବାଦ: ଏଣିକି ଉପାନ୍ତ ଅଞ୍ଚଳରେ ମଧ୍ୟ ରହିବନି ଇଣ୍ଟରନେଟ ସମସ୍ୟା । ଭାରତୀୟ ମୋବାଇଲ କଂଗ୍ରେସ 2023ର ସପ୍ତମ ସଂସ୍କରଣରେ ଜିଓ ନିଜର ନୂଆ ସର୍ଭିସ ନେଇ ଘୋଷଣା କରିଛି । କମ୍ପାନୀ ପକ୍ଷରୁ Jio Space Fiberକୁ ଖୁବ ଶୀଘ୍ର ଲଞ୍ଚ କରାଯିବା ନେଇ କୁହାଯାଇଛି । ଏହା ଦେଶର ବିଭିନ୍ନ ଦୁର୍ଗମ ଅଞ୍ଚଳ ସହିତ ମଧ୍ୟ ସଂଯୁକ୍ତ କରିପାରିବ । ଏହା ସାଟେଲାଇଟ ବେସ ଗିଗା ଫାଇବର ଟେକ୍ନୋଲୋଜି ଅଟେ । ଏହା ସାହାଯ୍ୟରେ ଉପାନ୍ତ ଅଞ୍ଚଳକୁ ମଧ୍ୟ ଇଣ୍ଟରନେଟ ସଂଯୋଗ କରାଯାଇ ପାରିବ ।
ଏନେଇ କମ୍ପାନୀ ପକ୍ଷରୁ କୁହାଯାଇଛି, "ଏହି ସେବା ସମଗ୍ର ଦେଶରେ ସୁଲଭ ଦରରେ ଉପଲବ୍ଧ ହେବ ।" କହିରଖୁଛୁ କି ବର୍ତ୍ତମାନ ଜିଓର Jio Fiber ବ୍ରଡବ୍ୟାଣ୍ଡ ଏବଂ Jio AirFiber ସେବା ଜାରି ରହିଛି । ଇଣ୍ଟରନେଟ ସଂଯୋଗ କରିବା ଉଭୟଙ୍କର କାମ ଅଟେ । ତେବେ ଆଜିର ଆଇଏସମି 2023ରେ କମ୍ପାନୀ ପକ୍ଷରୁ Jio Space Fiber ନେଇ ଘୋଷଣା କରାଯାଇଛି ।
ତେବେ ଜିଓ ଅଧ୍ୟକ୍ଷ ମୁକେଶ ଅମ୍ବାନୀ କହିଛନ୍ତି, "ଭାରତରେ ଲକ୍ଷ ଲକ୍ଷ ଘର ଏବଂ ବ୍ୟବସାୟ ପ୍ରତିଷ୍ଠାନକୁ ଜିଓ ପ୍ରଥମ ଥର ପାଇଁ ବ୍ରଡବ୍ୟାଣ୍ଡ ଇଣ୍ଟରନେଟ ସୁବିଧା ଯୋଗାଇଛି । କିନ୍ତୁ ଜିଓ ସ୍ସେସ ଫାଇବର ଉପାନ୍ତ ଅଞ୍ଚଳର ଲୋକଙ୍କୁ ଇଣ୍ଟରନେଟ ସେବା ପ୍ରଦାନ କରିବ । ଶିକ୍ଷା, ସ୍ୱାସ୍ଥ୍ୟ କିମ୍ବା ଅନ୍ୟାନ୍ୟ କ୍ଷେତ୍ରରେ ଜିଓ ସ୍ପେସ୍ ଫାଇବର ବ୍ୟବହାର କରାଯାଇପାରିବ । ଏହା ଦେଶର ଯେକୌଣସି ସ୍ଥାନରେ ମଧ୍ୟ ଉପଲବ୍ଧ ହେବ ।"
ପ୍ରକାଶଥାଉକି, ଭାରତର ଚାରୋଟି ସ୍ଥାନ ଜିଓ ସ୍ପେସ୍ ଫାଇବରର ସଂଯୋଗ ହୋଇଛି । ଗୁଜୁରାଟର ଗିର୍ ନ୍ୟାସନାଲ ପାର୍କ, ଛତିଶଗଡର କୋରବା, ଓଡ଼ିଶାର ନବରଙ୍ଗପୁର ଏବଂ ଆସାମର ONGC-Jorhatରେ ଜିଓ ସ୍ପେସ୍ ଫାଇବର ଯୋଡା ଯାଇଛି । ଜିଓ ଫାଇବର ଏବଂ ଜିଓ ଏୟାର ଫାଇବର ପରେ ରିଲାଏନ୍ସ ଜିଓର କନେକ୍ଟିଭିଟି ପୋର୍ଟଫୋଲିଓରେ ଏହା ତୃତୀୟ ପ୍ରମୁଖ ଟେକ୍ନୋଲୋଜି ।