महाराष्ट्र

maharashtra

धक्कादायक! नाशिकमधील प्रांताधिकाऱ्याची नियत घसरली, तलाठी महिलेकडे शरीर सुखाची मागणी

By

Published : Aug 17, 2021, 2:50 AM IST

नाशिक
नाशिक

येवला प्रांताधिकारी सोपान कासार यांनी शारीरिक सुखाची मागणी केल्याचा आरोप एका पीडित तलाठी महिलेने केला आहे. तर, दुसऱ्या एका तलाठी महिलेने 60 हजार रुपयांची मागणी केल्याचा आरोप प्रांत कासार यांच्यावर केला आहे. यामुळे खळबळ उडाली आहे. दरम्यान, प्रांत कासार यांच्यावर गुन्हा दाखल करण्यात आला आहे.

नाशिक - नाशिकमधून एक धक्कादायक बातमी समोर आली आहे. येवला प्रांताधिकारी सोपान कासार (Sopan Kasar) यांनी शारीरिक सुखाची मागणी केल्याचा आरोप एका पीडित तलाठी महिलेने केला आहे. तर, दुसऱ्या एका तलाठी महिलेने 60 हजार रुपयांची मागणी केल्याचा आरोप प्रांत कासार यांच्यावर केला आहे. त्यामुळे खळबळ उडाली आहे. या दोन्ही तलाठी महिलांनी मागण्या मान्य केल्या नाहीत. त्यामुळे प्रांताधिकाऱ्याकडून महिलांना बदलीची धमकी देण्यात आली आहे. याबाबत पालकमंत्री छगन भुजबळ (Nashik Guardian Minister Chhagan Bhujbal) यांना या महिलांनी निवेदन देत आपली व्यथा मांडली आहे. याबाबत येवला पोलीस ठाण्यात प्रांत अधिकाऱ्या विरोधात गुन्हा दाखल करण्यात आला आहे. तर महिला तलाठी मॅट कोर्टामध्ये (MAT Court) जाऊन बदलीला स्थगिती घेऊन आलेल्या आहेत.

येवला प्रांताधिकारी सोपान कासार यांची तलाठी महिलेकडे शारीरिक सुखाची मागणी

पहिल्या तलाठी महिलेचा आरोप

'मी येवला येथील एका गावातील तलाठी महिला आहे. एका नोटीसीचा खुलासा देण्याबाबत येवला प्रांताधिकारी सोपान कासार यांच्याकडे गेली होती. त्यांनी मला बराच वेळ ऑफिस बाहेर बसून ठवले. नंतर त्यांनी मला फोन करून घरी भेटण्यास बोलवले. मी घरी गेल्यानंतर त्यांनी या ना त्या कारणाने माझा हात पकडला व माझ्याशी जवळीक साधण्याचा प्रयत्न केला. तू मला सहकार्य कर, मी तुला सर्व ती मदत करतो, असं त्यानी म्हटलं. पण मी त्याला विरोध करत तिथून निघून गेली. नंतर कासार यांनी मला त्रास देण्यासाठी वेगळ्या पद्धतीने नोटीसा पाठवत माझी नांदगाव येथील दुर्गम भागात बदली केली', अशी तक्रार एका तलाठी महिलेने केला आहे.

दुसऱ्या तलाठी महिलेकडे 60 हजारांची मागणी

येवला तालुक्यातील दुसऱ्या तलाठी महिलेने प्रांताधिकारी सोपान कासार यांच्यावर आरोप केला आहे. 'दप्तर तपासताना मी चुका काढू शकतो. म्हणून मला 60 हजार रुपये द्या, अशी मागणी कासार यांनी केली. मी घाबरून 60 हजार रुपये दिले. मात्र प्रांताधिकाऱ्यांची अपेक्षा वाढत गेली. त्यामुळे मी वरीष्ठांकडे तक्रार केली', असे दुसऱ्या तलाठी महिलेने म्हटले आहे.

मॅटमधून बदलीला स्थगिती

याप्रकरणी प्रांताधिकारी कासार यांनी थेट महिलांच्या बदलीचे आदेश काढले. यातून या दोन्ही तलाठी महिलांचा आवाज दाबण्याचा प्रयत्न केला. या संदर्भातच महिलांनी मॅट कोर्टातून बदलीला स्थगिती मिळवली. तर कासार यांचा व्हिडीओ देखील रेकॉर्ड केला आहे. या दोन्ही महिला तलाठी यांनी स्थगिती मिळवल्यानंतर नाशिकचे जिल्हाधिकारी सुरज मांढरे (Nashik District Collector Suraj Mandhare) यांना भेटून आपले गाऱ्हाणे, झालेला त्रास सांगण्याचा प्रयत्न केला. मात्र सुरज मांढरे यांनी महिलांना मदत करण्याऐवजी अरेरावीची भाषा करत पत्रकारांना काही सांगू नका. नंतर बघू. तुम्ही तुमचं कार्यालय सोडून आलेच कसे? अशी विचारणा केली. यामुळे पीडित महिला तलाठी हताश होऊन जिल्हाधिकारी कार्यालयातून निघून गेल्या.

अखेर गुन्हा दाखल

या घटनेची पोलिसांनी गंभीर दखल घेतली आहे. तलाठी महिलेकडे शारीरिक सुखाची मागणी करणारे प्रांताधिकारी सोपान कासार यांच्या विरोधात भारतीय दंड विधान कलम 504 अंतर्गत येवला पोलीस ठाण्यात गुन्हा दाखल करण्यात आला आहे.

हेही वाचा -..तर तेथेच पवारांची आम्ही पोलखोल करणार, चंद्रकांत पाटलांचा इशारा

ABOUT THE AUTHOR

...view details