ಬಾಗಲಕೋಟೆ:ಜಿಲ್ಲೆಯಮುಧೋಳ ಪಟ್ಟಣದ ವೀರಶೈವ ಕಲ್ಯಾಣ ಮಂಟಪದ ಆವರಣದಲ್ಲಿ ಇಂದು ನಡೆದ ಕಾರ್ಯಕ್ರಮದ ವೇದಿಕೆ ಮೇಲೆ ಪ್ರತಿಪಕ್ಷದ ನಾಯಕ ಸಿದ್ದರಾಮಯ್ಯರು ಎಡವಿ ಬೀಳುತ್ತಿದ್ದ ಘಟನೆ ನಡೆಯಿತು. ಈ ವೇಳೆ ವೇದಿಕೆ ಮೇಲಿದ್ದ ಇತರ ನಾಯಕರು ಸಿದ್ದರಾಮಯ್ಯರನ್ನು ಕೈ ಹಿಡಿದು ತಡೆ ಹಿಡಿದರು.
ಮಾಜಿ ಸಚಿವ ಆರ್ಬಿ ತಿಮ್ಮಾಪುರ ಅವರ 60ನೇ ಹುಟ್ಟುಹಬ್ಬದ ನಿಮಿತ್ತ ವೀರಶೈವ ಕಲ್ಯಾಣ ಮಂಟಪದ ಆವರಣದಲ್ಲಿ ಕಾರ್ಯಕ್ರಮ ಆಯೋಜಿಸಲಾಗಿತ್ತು. ಕಾರ್ಯಕ್ರಮದ ವೇದಿಕೆಗೆ ಬರುತ್ತಿದ್ದಾಗ ಸಿದ್ದರಾಮಯ್ಯ ಏಕಾಏಕಿ ಏಕಾಏಕಿ ಎಡವಿದರು. ಇನ್ನೇನು ಕೆಳಗಡೆ ಬೀಳುತ್ತಾರೆ ಎಂಬಷ್ಟರಲ್ಲೇ ಮಾಜಿ ಸಚಿವ ವೀರಕುಮಾರ್ ಪಾಟೀಲ್ ಹಾಗೂ ವಿಧಾನ ಪರಿಷತ್ ಸದಸ್ಯ ಪ್ರಕಾಶ ಹುಕ್ಕೇರಿ ಕೈ ಹಿಡಿದುಕೊಂಡರು.
ಈ ಘಟನೆಯಿಂದ ಒಂದು ಕ್ಷಣ ಗಲಿಬಿಲಿಗೊಂಡ ಮಾಜಿ ಸಿಎಂ ಸಿದ್ದರಾಮಯ್ಯ, ಬಳಿಕ ಸಾವರಿಸಿಕೊಂಡು ಜನರತ್ತ ಕೈಬೀಸಿದರು. ನಂತರ ಜ್ಯೋತಿ ಬೆಳಗಿಸುವ ಮೂಲಕ ಕಾರ್ಯಕ್ರಮ ಉದ್ಘಾಟಿಸಿದರು. ಇದಾದ ಬಳಿಕ ಭಾಷಣದ ಸಮಯದಲ್ಲಿ ಅಡಚಣೆ ಉಂಟಾಯಿತು. ಕಾರ್ಯಕ್ರಮದ ಮಧ್ಯೆ ವಿದ್ಯುತ್ ಸಮಸ್ಯೆಯಿಂದ ಮೈಕ್ ಕನೆಕ್ಷನ್ ಕಟ್ ಆಗಿ ಕೆಲ ನಿಮಿಷ ಭಾಷಣ ನಿಲ್ಲಿಸಿದರು. ಕೆಲ ಸಮಯದ ಬಳಿಕ ವಿದ್ಯುತ್ ಬಂದಿದ್ದರಿಂದ ಭಾಷಣ ಪ್ರಾರಂಭಿಸಿದರು.