ডেনমাৰ্কৰ সহযোগত কলিয়াবৰত প্ৰথমখন ক'ভিড চিকিৎসালয় মুকলি

কলিয়াবৰৰ উলুৱনী ৰাজ‍্যিক চিকিৎসালয়ৰ চৌহদত প্ৰথমবাৰৰ বাবে ডেনমাৰ্কৰ সহযোগত ক'ভিড চিকিৎসালয় মুকলি (Covid Hospital inaugurated with help of Denmark) ৷ দেওবাৰে মুকলি কৰা হৈছে চিকিৎসালয়খন ৷

কলিয়াবৰ, 28 ফেব্ৰুৱাৰী : কলিয়াবৰত পোন প্ৰথমবাৰৰ বাবে ডেনমাৰ্কৰ সহযোগত নিৰ্মাণ কৰা হ'ল ক'ভিড চিকিৎসালয় (Covid Hospital inaugurated with help of Denmark) ৷ এই অনুষ্ঠানত উপস্থিত থাকে ডেনমাৰ্কৰ প্ৰতিনিধি ডাঃ উইলিয়াম জেকৱ, স্বাস্থ‍্যমন্ত্ৰীৰ লগতে স্বাস্থ‍্য বিভাগৰ কেন্দ্ৰীয় আৰু ৰাজ‍্য চৰকাৰৰ একাংশ উচ্চপদস্থ বিষয়া ।

কলিয়াবৰৰ উলুৱনী ৰাজ‍্যিক চিকিৎসালয়ৰ চৌহদত ৫৪ খন বিচনাযুক্ত অত‍্যাধুনিক সা-সুবিধাৰে সমৃদ্ধ ক'ভিড চিকিৎসালয়খন দেওবাৰে আনুষ্ঠানিকভাৱে মুকলি কৰা হয় (First Covid Hospital inaugurated in Kaliabor) । ভাৰত চৰকাৰ আৰু ডেনমাৰ্ক চৰকাৰৰ বুজাবুজিৰ ভিত্তিত ডেনমাৰ্ক চৰকাৰে যোগান ধৰা চিকিৎসা তথা গৃহ নিৰ্মাণৰ সা-সঁজুলিৰে নিৰ্মাণ কৰা হৈছে এই চিকিৎসালয়খন ।

উল্লেখ্য যে, সভাত উপস্থিত থাকি ডেনমাৰ্ক ৰাষ্ট্ৰদূত কাৰ্য‍ালয়ৰ প্ৰতিনিধি ডাঃ উইলিয়াম জেকৱে তাৎক্ষণিকভাৱে হাস্পতালখন নিৰ্মাণ কৰাত ভাৰত চৰকাৰ তথা অসম চৰকাৰে লোৱা পদক্ষেপৰ বাবে ভূয়ষী প্ৰশংসা কৰে । ইতিমধ‍্যে পঞ্জাৱ, নাগালেণ্ড, হায়দৰাবাদ আদি স্থানতো ডেনমাৰ্কৰ সহযোগত চিকিৎসালয় নিৰ্মাণ কাৰ্য অব্যাহত থকা বুলি প্ৰতিনিধিগৰাকীয়ে জানিবলৈ দিয়ে ।

আনহাতে, ৰাজ‍্যৰ স্বাস্থ‍্য মন্ত্ৰী কেশৱ মহন্তই ডেনমাৰ্ক চৰকাৰৰ এই মহানুভৱতাৰ শলাগ লয় । ৰাজ‍্যৰ স্বাস্থ‍্যখণ্ডত এনে পদক্ষেপে ৰাজ‍্যৰ জনসাধাৰণক যথেষ্ট উপকৃত কৰিব । মন্ত্ৰীগৰাকীয়ে কলিয়াবৰৰ কেইবাটিও হ'বলগীয়া উন্নয়নমূলক কামৰ বিষয়ে এই অনুষ্ঠানতে ৰাইজক উদ্দেশ্যি অৱগত কৰে ।

লগতে পঢ়ক :তিনিচুকীয়াত ব্যক্তিগতখণ্ডৰ প্ৰথমটো ক'ভিড টীকাকৰণ কেন্দ্ৰ মুকলি