গুৱাহাটী, ১৬ ছেপ্টেম্বৰ : শেহতীয়াকৈ অ’ টি টি প্লেটফৰ্মত মুক্তি লাভৰ বাবে সেউজ সংকেত লাভ কৰিছে এখন অসমভিত্তিক চলচ্চিত্ৰ ‘কাণ্ডাৰী’য়ে । গুৱাহাটীৰ কাহিলীপাৰাস্থিত জ্যোতিচিত্ৰবনত সংবাদ মাধ্যম আৰু বিশিষ্ট অতিথিসকলৰ উপস্থিতিত চলচ্চিত্ৰখনৰ পৰিচালকে CND প্লে’ এপত মুক্তি দিয়ে ছবিখন ।
অসমীয়াৰ সমান্তৰালকৈ হিন্দী ভাষাত একেলগে মুক্তি পোৱা কাণ্ডাৰীয়েই হৈছে প্ৰথমখন অসমীয়া ছবি ৷ ছবিখন শনিবাৰৰে পৰা চিএনডি প্লে’ত উপলব্ধ হৈছে । পৰিচালক আৰ কেৰ পৰিচালনাৰে নিৰ্মিত আৰু গুঞ্জন ভৰদ্বাজ, উদয়ন দুৱৰা, চিন্ময় কটকী, নিশা কাশ্যপ, প্ৰদীপ নিশীথ তথা প্ৰথমবাৰৰ বাবে অভিনেত্ৰী হিচাপে ৰূপালী পৰ্দাত ভৰি থোৱা নিতুমণি সিংহ অভিনীত চলচ্চিত্ৰখনৰ মূল কাহিনীটো এটা হত্যাৰ ৰহস্য হিচাপে আগবঢ়াই লৈ যোৱা হৈছে ৷
চলচ্চিত্ৰখনৰ বিশেষ প্ৰদৰ্শনী অনুষ্ঠানত নৱাগতা অভিনেত্ৰী নিতুমণি সিংহক অতিথিবৃন্দই ভূয়সী প্ৰশংসা কৰে আৰু নিজৰ শ্বাসৰুদ্ধকাৰী অভিনয়েৰে তেওঁ সকলোৰে দৃষ্টি আকৰ্ষণ কৰিবলৈ সক্ষম হয় । জনপ্ৰিয় অভিনেতা উৎপল দাসৰ সৈতে এটা সংগীত ভিডিঅ’ৰে অভিনয় জীৱন আৰম্ভ কৰা অভিনেত্ৰীগৰাকীয়ে পৰৱৰ্তী সময়ত বহুতো সফল সংগীত এলবাম আৰু ধাৰাবাহিকত নিজৰ অভিনয় প্ৰতিভা প্ৰদৰ্শন কৰিবলৈ সক্ষম হৈছে ।